സിറ്റി ഓഫ്
ജോയ്

ലണ്ടന്‍: ഇംഗ്ലീഷ് പ്രീമിയര്‍ ലീഗ് കിരീടം മാഞ്ചസ്റ്റര്‍ സിറ്റിക്ക്. മാഞ്ചസ്റ്റര്‍ യുനൈറ്റഡ് സ്വന്തം തട്ടകത്തില്‍ പട്ടികയില്‍ അവസാനമുള്ള വെസ്റ്റ് ബ്രോംവിച് ആല്‍ബിയോണിനോട് 1-0ത്തിന് നാണംകെട്ട തോല്‍വി ഏറ്റുവാങ്ങിയതോടെ സിറ്റി കിരീടം ഉറപ്പാക്കി.
നേരത്തെ ടോട്ടനം ഹോട്‌സ്പറിനെ എവേ പോരാട്ടത്തില്‍ 1-3ന് വീഴ്ത്തി അവര്‍ കിരീട നേട്ടം രാജകീയമായി തന്നെ ആഘോഷിച്ചു. അഞ്ച് കളികള്‍ കൂടി ബാക്കി നില്‍ക്കേയാണ് സിറ്റി കിരീടം ഉറപ്പിച്ചത്. 87 പോയിന്റുകളാണ് നിലവില്‍ അവര്‍ക്കുള്ളത്. രണ്ടാം സ്ഥാനത്തുള്ള യുനൈറ്റഡിന് 71 പോയിന്റുകള്‍. 2014ല്‍ പെപ് ഗെര്‍ഡിയോള പരിശീലകനായി ചുമതലയേറ്റ ശേഷം സിറ്റി നേടുന്ന ആദ്യ പ്രീമിയര്‍ ലീഗ് കിരീടമാണിത്. ഇത് അഞ്ചാം തവണയാണ് സിറ്റി ഇംഗ്ലീഷ് ചാംപ്യന്‍മാരാകുന്നത്. ഗബ്രിയേല്‍ ജീസസ്, ഇല്‍കെ ഗുണ്ടകന്‍, റഹിം സ്റ്റെര്‍ലിങ് എന്നിവരുടെ ഗോളിലാണ് സിറ്റി ടോട്ടനത്തെ തകര്‍ത്തത്. 42ാം മിനുട്ടില്‍ എറിക്‌സന്‍ ടോട്ടനത്തിനായി ആശ്വാസ ഗോള്‍ നേടി.
മറ്റ് മത്സരങ്ങളില്‍ ലിവര്‍പൂള്‍ 3-0ത്തിന് ബേണ്‍മൗത്തിനെ കീഴടക്കി. ആഴ്‌സണലിന്റെ എവേ പോരാട്ടത്തിലെ മോശം സ്ഥിതി തുടര്‍ന്നപ്പോള്‍ അവരെ ന്യൂകാസില്‍ സ്വന്തം തട്ടകത്തില്‍ 2-1ന് അട്ടിമറിച്ചു.