ജിദ്ദ: സഊദിയില്‍ നിയമ സ്ഥാപനങ്ങളിലും ലീഗല്‍ കണ്‍സള്‍ട്ടന്‍സികളിലും സ്വദേശിവല്‍കരണം നടപ്പാക്കുന്നു. ഇതിനുള്ള ധാരണാപത്രത്തില്‍ തൊഴില്‍ മന്ത്രാലയവും ബാര്‍ അസോസിയേഷനും ഒപ്പുവച്ചു.
തൊഴില്‍,സാമൂഹിക വികസന മന്ത്രാലയത്തെ പ്രതിനിധീകരിച്ച് സഊദിവല്‍കരണ കാര്യങ്ങള്‍ക്കുള്ള അണ്ടര്‍ സെക്രട്ടറി എന്‍ജിനീയര്‍ ഗാസി ബിന്‍ ദാഫിര്‍ അല്‍ശഹ്‌റാനിയും ബാര്‍ കൗണ്‍സില്‍ അസോസിയേഷന്‍ സെക്രട്ടറി ജനറല്‍ ബകര്‍ ബിന്‍ അബ്ദുല്ലത്തീഫ് അല്‍ഹുബൂബും ആണ് ധാരണാപത്രത്തില്‍ ഒപ്പുവച്ചത്.
തൊഴില്‍ വിപണിയില്‍ സ്വദേശി ജീവനക്കാരുടെ പങ്കാളിത്തം വര്‍ധിപ്പിക്കുന്നതിനുള്ള ശ്രമങ്ങളുടെ ഭാഗമായാണ് നിയമ സ്ഥാപനങ്ങളിലും സ്വദേശിവല്‍ക്കരണം നടപ്പാക്കുന്നത്. ഈ മേഖലയില്‍ സ്വദേശിവല്‍ക്കരണം നടപ്പാക്കണമെന്ന് സമിതി നേരത്തെ ശിപാര്‍ശ ചെയ്തിരുന്നു.
ബന്ധപ്പെട്ട വകുപ്പുകളുമായി സഹകരിച്ചും ഏകോപനം നടത്തിയും നിയമ സ്ഥാപനങ്ങളിലും ലീഗല്‍ കണ്‍സള്‍ട്ടന്‍സികളിലും സഊദി വല്‍ക്കരണം നടപ്പാക്കുന്നതിനുള്ള പദ്ധതി തയാറാക്കുന്നതിന് തൊഴില്‍ മന്ത്രാലയം ശ്രമിച്ചുവരികയായിരുന്നു.
നിയമ സ്ഥാപന, ലീഗല്‍ കണ്‍സള്‍ട്ടന്‍സി മേഖലയുമായി ബന്ധപ്പെട്ട അടിസ്ഥാന വിവര ദൗര്‍ലഭ്യത്തിന് പരിഹാരം കാണുക, മേഖലയെക്കുറിച്ച സമഗ്ര വിവരങ്ങള്‍ അടങ്ങിയ ഡാറ്റ ലഭ്യമാക്കുക, 2020 ഓടെ പ്രവൃത്തിപഥത്തില്‍ നടപ്പാക്കേണ്ട സ്വദേശി അനുപാതം നിര്‍ണയിക്കുക, പരിശീലന, തൊഴില്‍ പദ്ധതികള്‍ക്ക് പിന്തുണ നല്‍കുക എന്നീ പദ്ധതികളിലൂടെ ഈ മേഖലയില്‍ സഊദിവല്‍ക്കരണം നടപ്പാക്കുന്നതിനുള്ള തന്ത്രങ്ങള്‍ ധാരണാപത്രത്തില്‍ ഉള്‍പ്പെടുത്തിയിട്ടുണ്ട്.