തൃശൂര്‍: തൃശൂര്‍ പോസ്റ്റ് ഓഫിസ് റോഡിലെ ഫ്രൂട്ട്‌സ് മൊത്തകച്ചവടക്കാരനായ യുവാവിനെ ബൈക്കില്‍ മുഖംമൂടി ധരിച്ചെത്തി മുഖത്തേക്ക് കുരുമുളക് സ്‌പ്രേ ചെയ്ത് തലക്കടിച്ച് പണം കവരാന്‍ ശ്രമിച്ച കേസിലെ പ്രതിയായ യുവാക്കളെ തൃശൂര്‍ സിറ്റി പൊലിസ് കമ്മിഷ്ണര്‍ രാഹുല്‍ ആര്‍. നായറിന്റെ നേതൃത്വത്തിലുള്ള തൃശൂര്‍ സിറ്റി ഷാഡോ പോലിസ് അറസ്റ്റ് ചെയ്തു. ചിയ്യാരം സ്വദേശിയായ ചെമ്പകപ്പിള്ളി വീട്ടില്‍ രാഗു എന്നറിയപ്പെടുന്ന രാഹുല്‍ (23), പള്ളിപ്പുറം സ്വദേശി പുളിപ്പറമ്പില്‍ വീട്ടില്‍ കുട്ടു എന്നറിയപ്പെടുന്ന അജുന്‍ (22) എന്നിവരാണ് പൊലിസിന്റെ പിടിയിലാകുന്നത്.
ഇക്കഴിഞ്ഞ വിഷുവിന്റെ തലേദിവസം ശനിയാഴ്ച കാലത്ത് ഒമ്പതര മണിക്കാണ് സംഭവം നടന്നത്. ഫ്രൂട്ട്‌സിന്റെ മൊത്തകച്ചവടക്കാരനായ കാളത്തോട് സ്വദേശിയായ കുരിക്കപീടികയില്‍ വീട്ടില്‍ ഫാറൂഖിനെ തൃശൂര്‍ പോസ്റ്റ് ഓഫിസ് റോഡിലെ ഫ്രൂട്ട്‌സ് ഗോഡൗണില്‍ കച്ചവടം നടത്തുന്നതിനിടെ ബൈക്കില്‍ മുഖംമൂടി ധരിച്ചെത്തിയ രണ്ട് യുവാക്കള്‍ ഗോഡൗണില്‍ എത്തുകയും അതിനുശേഷം ഫാറൂഖിന്റ മുഖത്തേക്ക് കുരുമുളക് സ്‌പ്രേ അടിച്ച് മേശയില്‍ സൂക്ഷിച്ചിരുന്ന പണം കവര്‍ച്ച ചെയ്യാന്‍ ശ്രമിച്ചപ്പോള്‍ എതിര്‍ത്ത ഫാറൂഖിനെ മുളവടി ഉപയോഗിച്ച് ആക്രമിച്ച് തലക്ക് പരുക്കല്‍പ്പിച്ച് രക്ഷപ്പെട്ട സംഭവത്തിലാണ് പ്രതികളായ യുവാക്കള്‍ അറസ്റ്റിലാകുന്നത്. കവര്‍ച്ചാശ്രമത്തിനിടെ തലക്ക് ഗുരുതരമായി പരുക്കേറ്റ ഫാറൂഖിനെ അപ്പേള്‍തന്നെ ആശുപത്രിയില്‍ എത്തിക്കുകയും തൃശൂര്‍ ഈസ്റ്റ് പൊലിസ് കേസെടുത്ത് അന്വേഷണം ആരംഭിക്കുകയും ചെയ്തിരുന്നു.