തിരുവനന്തപുരം: തിരുവനന്തപുരം പബ്‌ളിക് ലൈബ്രറിയില്‍ ഇശല്‍ മുല്ല പൂത്തു. അവധിക്കാല ക്ലാസിന്റെ ഭാഗമായി മോയിന്‍കുട്ടി വൈദ്യര്‍ മാപ്പിള കലാ അക്കാദമിയാണ് ഇമ്പമുള്ള പാട്ടുകള്‍ കൊണ്ട് കുട്ടികളില്‍ ആനന്ദം നിറച്ചത്.
മോയിന്‍കുട്ടി വൈദ്യര്‍, പുലിക്കോട്ടില്‍ ഹൈദര്‍, പുന്നയൂര്‍ക്കുളം ബാപ്പു എന്നിവര്‍ പാട്ടുകളിലൂടെ ലൈബ്രറിയില്‍ നിറഞ്ഞു. കത്ത്, കുത്ത്, കമ്പി തുടങ്ങി വിവിധ പ്രാസ വൃത്തങ്ങള്‍ വിവരിച്ചുള്ള അവതരണം കുട്ടികളെ പാട്ടിന്റെ വിവിധ മേഖലകളിലേക്കു നയിച്ചു.
ബദര്‍, ബദറുല്‍ മുനീര്‍ ഹുസ്‌നുല്‍ ജമാല്‍ പാട്ടുകള്‍, കത്ത് പാട്ടുകള്‍, ചലച്ചിത്രഗാനങ്ങള്‍ എന്നിവ പാട്ടിന്റെ തനിമയിലേക്കുള്ള സഞ്ചാരമായിരുന്നു.
മോയിന്‍കുട്ടി വൈദ്യര്‍ അക്കാദമി മെമ്പര്‍ സെക്രട്ടറി റസാഖ് പാട്ടുകളെ കുറിച്ച് ആമുഖ പ്രഭാഷണം നടത്തി. പക്കര്‍ മാറഞ്ചേരി, ഷാജഹാന്‍ മാറഞ്ചേരി ഗാനങ്ങള്‍ ആലപിച്ചു.