തുറവൂര്‍: വിവാഹ വീട്ടിലുണ്ടായ തര്‍ക്കത്തെ തുടര്‍ന്ന് പട്ടികജാതി കുടുംബത്തിന് നേരെ ആക്രമണം. ഇരുമ്പ് വടികൊണ്ടുള്ള അടിയേറ്റ് ഗൃഹനാഥനടക്കം നാല് പേര്‍ക്ക് ഗുരുതരപരുക്ക്.
തുറവൂര്‍ പഞ്ചായത്ത് ഒന്നാം വാര്‍ഡ് പള്ളിത്തോട് കാട്ടുതറയില്‍ കൊച്ചപ്പന്‍ (67), ഭാര്യ ചന്ദ്രിക (55), മക്കളായ രഞ്ജിനി (37), രംഗലാല്‍ (36) എന്നിവരാണ് പരുക്കേറ്റ് തുറവൂര്‍ താലൂക്കാശുപത്രിയിലുളളത്. കഴിഞ്ഞ ദിവസം രാത്രി പത്തരയ്ക്കായിരുന്നു സംഭവം.
ഇരുമ്പുവടി കൊണ്ടുള്ള അടിയേറ്റ രഞ്ജിനിയുടെ മൂക്കും വലതുകണ്ണും ചന്ദ്രികയുടെ ഇടതു കണ്ണും തകര്‍ന്നിട്ടുണ്ട്. ചന്ദ്രിക ഹൃദ്രോഗിയാണ്. വീടിനു സമീപത്തെ വിവാഹ വീട്ടില്‍ വച്ച് കൊച്ചപ്പന്റെ മകന്‍ രംഗലാലും സമീപവാസികളുമായിട്ടുണ്ടായ തര്‍ക്കമാണ് സംഘട്ടനത്തില്‍ കലാശിച്ചത്.
പിന്നീട് വീട്ടില്‍ നിന്നും രംഗലാല്‍ ബൈക്കില്‍ പുറത്തേക്ക് പോയപ്പോഴാണ് വീണ്ടും ആക്രമണം ഉണ്ടായത്. മര്‍ദ്ദനം തടയാന്‍ ശ്രമിക്കുന്നതിനിടയിലാണ് മറ്റുളളവര്‍ക്ക് അടിയേറ്റത്. രക്ഷപ്പെടാന്‍ ഇവര്‍ നിലവിളിച്ചെങ്കിലും വിവാഹ വീട്ടിലെ ബഹളം മൂലം ആരും കേട്ടില്ല. ഇത് അക്രമികള്‍ക്ക് കൂടുതല്‍ സൗകര്യമായി.
പട്ടികജാതി-പട്ടികവര്‍ഗ പീഡന നിരോധന നിയമപ്രകാരം പോലിസ് കേസ് എടുത്തിട്ടുണ്ട്. ചേര്‍ത്തല ഡി.വൈ.എസ്.പി.ക്കാണ് അന്വേഷണച്ചുമതല.