കൊച്ചി: വരാപ്പുഴ കസ്റ്റഡി മരണത്തില്‍ പറവൂര്‍ സി.ഐ സാം ക്രിസ്പിന്‍, വരാപ്പുഴ എസ്.ഐ ദീപക് എന്നിവര്‍ക്ക് ഗുരുതര വീഴ്ച്ച പറ്റിയെന്നു കണ്ടെത്തല്‍. ശ്രീജിത്തിന്റെ അറസ്റ്റ് രേഖപ്പെടുത്തിയതില്‍ ഇരുവര്‍ക്കും വന്‍ വീഴ്ച്ച പറ്റിയെന്നാണ് കണ്ടെത്തല്‍. അറസ്റ്റ് രേഖപ്പെടുത്തുമ്പോള്‍ സി.ഐ ശ്രീജിത്തിനെ കണ്ടിട്ടുപോലുമില്ല. അറസ്റ്റ് രേഖപ്പെടുത്തുമ്പോള്‍ പ്രതിക്ക് ഏതെങ്കിലും തരത്തിലുള്ള മര്‍ദ്ദനമേറ്റിരുന്നോ ശരീരത്ത് മുറിവുകളുണ്ടോ എന്നൊക്കെ പരിശോധിക്കേണ്ടതാണ്. എന്നാല്‍ സി.ഐ ഇതിനൊന്നും തയാറായിരുന്നില്ല. ഇതാണ് ഗുരുതര വീഴ്ച്ചയായി വിലയിരുത്തപ്പെടുന്നത്. എസ്.ഐ ദീപക്കിനെ അറസ്റ്റ് ചെയ്തില്ലെങ്കില്‍ പ്രക്ഷോപം തുടങ്ങുമെന്ന് ശ്രീജിത്തിന്റെ കുടുംബം വ്യക്തമാക്കി. അറസ്റ്റ് ഉണ്ടാകുന്നതുവരെ ദീപക്കിന്റെ വീടിനു മുന്നില്‍ സത്യാഗ്രഹം നടത്തുമെന്നും ശ്രീജിത്തിന്റെ അമ്മ ശ്യാമള പറഞ്ഞു.