കാലിഫോര്‍ണിയ: പരുക്കിന്റെ പിടിയിലകപ്പെട്ട സൂപ്പര്‍ താരങ്ങളില്ലാതെ യുവതാരനിരയുമായി ആദ്യ മല്‍സരത്തിനിറങ്ങിയ ബ്രസീല്‍ സമനിലയില്‍ വീണു. മല്‍സരത്തില്‍ കൂടുതല്‍ സമയം ബോള്‍ കാലുകളുണ്ടായിട്ടും ഇക്വഡോറിന്റെ പ്രതിരോധനിര തുളച്ചുകയറ്റാനുള്ള കാലുകള്‍ ബ്രസീലിലുണ്ടായിരുന്നില്ല. സൂപ്പര്‍താരം നെയ്മറിന്റെയും കക്കായുടെയും വിടവ് ബ്രസീലില്‍ പ്രകടമായിരുന്നു. 65ാം മിനുറ്റില്‍ ഇക്വഡോര്‍ താരം എന്നര്‍ വലന്‍സിയ ബ്രസീല്‍ വല ചലിപ്പിച്ചെങ്കിലും റഫറി ഗോള്‍ അനുവദിച്ചില്ല.
ഒളിംപിക്‌സ് ലക്ഷ്യമിട്ട് യുവതാരനിരയുമായെത്തിയ ബ്രസീലിന് ഇനിയുള്ള കളികള്‍ അനിശ്ചിതത്വത്തിലാണ്. വലിയ സ്വപ്‌നങ്ങളുമായാണ് മഞ്ഞപ്പടയുടെ വരവെങ്കിലും ടീമില്‍ മികച്ചൊരു ഫോര്‍വേഡില്ലാത്തത് ടീമിന്റെ സ്വപ്‌നങ്ങള്‍ക്ക് തിരിച്ചടിയായിട്ടുണ്ട്. കോപ അമേരിക്കയ്ക്ക് നെയ്മറെ ബാഴ്‌സലോണ വിട്ടുനല്‍കാത്തതാണ് ടീമിനെ പ്രധാനമായും വലയ്ക്കുന്നത്.