ന്യൂഡല്‍ഹി: സാമ്പത്തിക തട്ടിപ്പ് നടത്തി രാജ്യം വിടുന്നവരുടെ ആസ്തികള്‍ കണ്ടുകെട്ടാന്‍ വ്യവസ്ഥ ചെയ്യുന്ന ഓര്‍ഡിനന്‍സിന് കേന്ദ്ര മന്ത്രി സഭയുടെ അംഗീകാരം. കിങ്ഫിഷര്‍ ഉടമ വിജയ് മല്യ, വജ്രവ്യാപാരി നീരവ് മോദി അടക്കമുള്ളവര്‍ കോടിക്കണക്കിന് രൂപയുടെ തട്ടിപ്പ് നടത്തി രാജ്യം വിട്ട പശ്ചാത്തലത്തിലാണ് കേന്ദ്ര സര്‍ക്കാര്‍ പുതിയ ഓര്‍ഡിനന്‍സ് കൊണ്ടുവരുന്നത്. തട്ടിപ്പ് നടത്തി രാജ്യം വിടുന്നവരെ തിരിച്ചെത്തിക്കുകയും അവരെ നിയമത്തിന് മുന്‍പില്‍ എത്തിക്കുകയും ചെയ്യുകയെന്നതാണ് സര്‍ക്കാര്‍ ലക്ഷ്യം.
പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ചേര്‍ന്ന മന്ത്രിസഭാ യോഗമാണ് ഓര്‍ഡിനന്‍സിന് അംഗീകാരം നല്‍കിയത്. 13,000 കോടിയിലധികം രൂപയുടെ വായ്പാ തട്ടിപ്പ് നടത്തി വജ്രവ്യാപാരി നീരവ് മോദിയും അമ്മാവന്‍ മെഹുല്‍ ചോക്‌സിയും രാജ്യം വിട്ടത് കേന്ദ്ര സര്‍ക്കാരിനെതിരേ വലിയ വിമര്‍ശനത്തിന് വഴിവച്ചിരുന്നു. വിവിധ ബാങ്കുകള്‍ നല്‍കിയ കോടിക്കണക്കിന് രൂപയുടെ വായ്പ തിരിച്ചടക്കാതെ വിജയ് മല്യ രാജ്യം വിട്ടതും അദ്ദേഹത്തെ ഇന്ത്യയില്‍ തിരിച്ചെത്തിച്ച് നിയമത്തിന് മുന്‍പില്‍ ഹാജരാക്കാന്‍ കഴിയാത്തതും വലിയ പ്രതിഷേധത്തിനാണ് ഇടയാക്കിയിട്ടുള്ളത്. 9000 കോടി രൂപയാണ് വിജയ്മല്യ തട്ടിയതെന്നായിരുന്നു ബാങ്കുകളുടെ കണ്‍സോര്‍ഷ്യം കോടതിയില്‍ അറിയിച്ചിരുന്നത്. വായ്പാ തട്ടിപ്പ് ഭാവിയില്‍ ഉണ്ടാകാതിരിക്കാനാണ് കേന്ദ്ര സര്‍ക്കാര്‍ ഓര്‍ഡിനന്‍സ് കൊണ്ട് ലക്ഷ്യം വയ്ക്കുന്നത്.
തട്ടിപ്പുനടത്തി രക്ഷപ്പെട്ടവരേയും ഇന്ത്യയിലേക്ക് തിരിച്ചുവരാന്‍ തയാറാകാത്തവരേയും പിടികിട്ടാപ്പുള്ളികളായ സാമ്പത്തിക കുറ്റവാളികളായി പ്രഖ്യാപിക്കും. ഇത്തരക്കാരെ വിചാരണ ചെയ്യാന്‍ പ്രത്യേക കോടതികള്‍ സ്ഥാപിക്കുന്നതിനും ആസ്തികള്‍ ഏറ്റെടുക്കുന്നതിനുമുള്ള നടപടികളുമായി മുന്നോട്ടുപോകാന്‍ പ്രത്യേക സമിതി രൂപീകരിക്കാനും ഓര്‍ഡിനന്‍സ് വ്യവസ്ഥ ചെയ്യുന്നു. നൂറ് കോടിയിലധികം രൂപയുടെ തട്ടിപ്പ് നടത്തിയവരുടെ കേസുകള്‍ മാത്രമാകും പ്രത്യേക കോടതി പരിഗണിക്കുക. ബാങ്കുകള്‍ അടക്കമുള്ള സ്ഥാപനങ്ങളുടെ സാമ്പത്തിക സ്ഥിതിയെ ഇത്തരം തട്ടിപ്പുകള്‍ പ്രതികൂലമായി ബാധിക്കാതിരിക്കാനാണ് കേന്ദ്ര സര്‍ക്കാര്‍ ഓര്‍ഡിനന്‍സ് കൊണ്ടുവരുന്നത്.