കണ്ണൂര്‍: സെന്‍ട്രല്‍ ജയിലിലേക്കെത്തിച്ച പ്രതിയുടെ വൈദ്യപരിശോധനയെ ചൊല്ലി പൊലിസ് ഉദ്യോഗസ്ഥരും ജയില്‍ വാര്‍ഡന്‍മാരും തമ്മില്‍ തര്‍ക്കം. പൊലിസുകാരെ ജയില്‍ വാര്‍ഡന്‍മാര്‍ തടഞ്ഞു വച്ചതായും പരാതിയുണ്ട്. 

കഴിഞ്ഞ ദിവസം രാത്രിയാണ് കണ്ണൂര്‍ സെന്‍ട്രല്‍ ജയിലില്‍ നാടകീയ സംഭവങ്ങള്‍ അരങ്ങേറിയത്. മട്ടന്നൂര്‍ പൊലിസ് സ്‌റ്റേഷനിലെ മൂന്ന് ഉദ്യോഗസ്ഥരെ ജയിലില്‍ തടഞ്ഞുവെക്കുകയായിരുന്നു. പൊതുസ്ഥലത്ത് മദ്യപിച്ചെന്ന കുറ്റത്തില്‍ പിഴയടക്കാത്തതിനെ തുടര്‍ന്ന് റിമാന്‍ഡിലായ മട്ടന്നൂര്‍ കല്ലൂരിലെ ബാബുവിനെയും കൊണ്ടാണ് സ്റ്റേഷനിലെ സിവില്‍ പൊലിസ് ഓഫിസര്‍മാരായ സുജിത്ത്, രജിത്ത്, സജിത്ത് എന്നിവര്‍ ജയിലിലെത്തിയത്. മട്ടന്നൂര്‍ ഗവ.ആശുപത്രിയില്‍ 6.45ന് പ്രതിയെ പരിശോധനക്ക് വിധേയമാക്കി ഹെല്‍ത്ത് സ്‌ക്രീനിങ് റിപ്പോര്‍ട്ടും അനുബന്ധ രേഖകളും കൊണ്ടാണ് പൊലിസ് എത്തിയത്.
ഇതിനിടെ വൈകിയെത്തിയെന്ന് പറഞ്ഞ് ജയില്‍ ഉദ്യോഗസ്ഥര്‍ പൊലിസുമായി വാക്തര്‍ക്കത്തില്‍ ഏര്‍പ്പെട്ടു. ഇവരുടെ സംസാരത്തിനിടെ പൊലിസ് വാഹനത്തിലിരുന്ന പ്രതി ഉറങ്ങിപ്പോയി.
വാഹനത്തില്‍ ഉറങ്ങിക്കിടക്കുന്ന പ്രതിയെ കണ്ട്, പൊലിസ് ഇയാളെ മര്‍ദ്ദിക്കുകയോ മറ്റോ ചെയ്‌തെന്ന് സംശയം തോന്നിയ ജയില്‍ അധികൃതര്‍ കൊണ്ടുവന്ന റിപ്പോര്‍ട്ട് പോരെന്നും ജില്ലാ ആശുപത്രിയില്‍ നിന്ന് പുതിയത് വേണമെന്നും ശഠിച്ചു.
ഏറെ നേരം തര്‍ക്കിച്ചെങ്കിലും പ്രതിയെ ഏറ്റെടുക്കാന്‍ ജയില്‍ അധികൃതര്‍ തയാറായില്ല. തുടര്‍ന്ന് ജയിലില്‍ നിന്നുള്ള ഒരു ഉദ്യോഗസ്ഥനടക്കം രാത്രി 11 മണിയോടെ പ്രതിയെ ജില്ലാ ആശുപത്രിയില്‍ എത്തിച്ച് പരിശോധന നടത്തി. തിരിച്ചെത്തിയപ്പോള്‍ പഴയ റിപ്പോര്‍ട്ട് കൂടി വേണമെന്നായി ജയില്‍ ഉദ്യോഗസ്ഥര്‍. നിയമപരമായി ഇതിന്റെ ആവശ്യമില്ലെന്ന് പൊലിസുകാര്‍ വാദിച്ചു. തുടര്‍ന്ന് പ്രതിയുമായി തിരിച്ചുപോരാന്‍ ഉന്നത പൊലിസ് ഉദ്യോഗസ്ഥര്‍ നിര്‍ദേശിച്ചതനുസരിച്ച് തിരികെ പോകാന്‍ ഒരുങ്ങിയപ്പോള്‍ പൊലിസ് ഉദ്യോഗസ്ഥരെ തടഞ്ഞുവെക്കുകയായിരുന്നു. തുടര്‍ന്ന് ജയിലര്‍ എത്തി പൊലിസ് ഉദ്യോഗസ്ഥരെ അനുനയിപ്പിച്ച് നടപടി ക്രമങ്ങള്‍ പൂര്‍ത്തിയാക്കിയാണ് പ്രതിയെ ജയിലില്‍ പ്രവേശിപ്പിച്ചത്.

ജില്ലാ പൊലിസ് മേധാവിക്കും മജിസ്‌ട്രേറ്റിനും പരാതി

മട്ടന്നൂര്‍: റിമാന്‍ഡ് പ്രതിയുമായി കണ്ണൂര്‍ സെന്‍ട്രല്‍ ജയിലിലെത്തിയ സിവില്‍ പൊലിസ് ഓഫിസര്‍മാരെ ജയില്‍ ഉദ്യോഗസ്ഥന്‍ അസഭ്യം പറഞ്ഞ് ഭീഷണിപ്പെടുത്തിയെന്നാരോപിച്ച് പരാതി നല്‍കി.
മട്ടന്നൂര്‍ പൊലിസ് സ്‌റ്റേഷനിലെ സീനിയര്‍ സിവില്‍ പൊലിസ് ഓഫിസര്‍ സി.കെ സുജിത്താണ് ഇതുസംബന്ധിച്ച് മട്ടന്നൂര്‍ ജുഡിഷ്യല്‍ ഒന്നാം ക്ലാസ് മജിസ്‌ട്രേറ്റ്, ജില്ലാ പൊലിസ് മേധാവി, ജയില്‍ സൂപ്രണ്ട് എന്നിവര്‍ക്ക് പരാതി നല്‍കിയത്. ജയില്‍ ഉദ്യോഗസ്ഥരുടെ ആനാവശ്യ നടപടി കൃത്യനിര്‍വഹണത്തില്‍ തടസവും മാനഹാനിയുമുണ്ടാക്കിയെന്നാണ് പരാതിയില്‍ പറയുന്നത്.