വാടാനപ്പള്ളി: പ്രകൃതിയുമായി ഇഴുകി ചേര്‍ന്നുള്ള ജീവിതശൈലി സംസ്‌കാരമാക്കി രൂപപ്പെടുത്താന്‍ പുതിയ തലമുറ ശ്രമിക്കണമെന്ന് കൃഷി വകുപ്പു മന്ത്രി വി.എസ് സുനില്‍കുമാര്‍ പറഞ്ഞു. ലോക പരിസ്ഥിതി ദിനത്തോടനുബന്ധിച്ച് ഏങ്ങണ്ടിയൂര്‍ എം.ഐ മിഷന്‍ ആശുപത്രിയില്‍ നടന്ന ഹരിത കൂട്ടായ്മ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
 ശുദ്ധജലവും ശുദ്ധ വായുവും വരും തലമുറയുടേയും അവകാശമാണെന്ന ബോധം നമുക്കുണ്ടാകണം. ആയുസ് വര്‍ധിക്കുന്നെങ്കിലും മനുഷ്യര്‍ ആരോഗ്യമില്ലാത്തവരായി മാറുകയാണ്. പരിസ്ഥിതി എന്ന അടിത്തറ നഷ്ടപ്പെടുത്തിയുള്ള ഒരു വികസനവും സാധ്യമല്ല. പ്രകൃതിയുമായുള്ള ബന്ധത്തില്‍ നിന്ന് അകന്നതാണ് പുതിയ തലമുറയുടെ ആരോഗ്യത്തിന് കോട്ടം വരുത്തുന്നത്. ജൂണ്‍ അഞ്ചിന് മാത്രമല്ല, എല്ലാ ദിവസവും പരിസ്ഥിതി സംരക്ഷണത്തിനായി എല്ലാവരും മുന്നോട്ടു വരണമെന്നും മന്ത്രി അഭിപ്രായപ്പെട്ടു.
പരിസ്ഥിതി ദിനത്തോടനുബന്ധിച്ച് എഫ്.സി.സി സന്യാസ സമൂഹം പുറത്തിറക്കിയ സ്റ്റിക്കറിന്റെ പ്രകാശനവും മന്ത്രി നിര്‍വഹിച്ചു. ഏങ്ങണ്ടിയൂര്‍ ഗ്രാമപഞ്ചായത്ത് പ്രസിഡന്റ് കെ.വി അശോകന്‍ അധ്യക്ഷനായിരുന്നു. ഫോറസ്റ്റ് കാന്‍സര്‍വേറ്റര്‍ ജോര്‍ജ് മാത്തച്ചന്‍ മുഖ്യാതിഥിയായി. മണിപ്പൂര്‍ സര്‍വകലാശാല ഇക്കോ ഇമ്മ്യൂണോളജി വിഭാഗം പ്രൊഫസര്‍ മദര്‍ ഡോ.റോസ് അസില്‍ ബോധവല്‍ക്കരണ ക്ലാസെടുത്തു.
പരിസ്ഥിതി പ്രവര്‍ത്തകന്‍ പ്ലാവ് ജയനെ ചടങ്ങില്‍ ആദരിച്ചു. എം.ഐ മിഷന്‍ ആശുപത്രി ഡയറക്ടര്‍ ഫാ.ഡോ.ഫ്രാന്‍സിസ് ആലപ്പാട്ട്, സൂപ്രണ്ട് ഡോ.വര്‍ഗീസ് പഞ്ഞിക്കാരന്‍, അസിസ്റ്റന്റ് ഡയറക്ടര്‍ ഫാ.ജിമ്മി എടക്കളത്തൂര്‍ സംസാരിച്ചു.
 ആശുപത്രിയിലെ മുഴുവന്‍ രോഗികള്‍ക്കുള്ള കറിവേപ്പ്, മുരിങ്ങ തൈകളുടെ വിതരണം കൃഷി അസിസ്റ്റന്റ് ഡയറക്ടര്‍ കെ.ജെ ഒനില്‍ നിര്‍വ്വഹിച്ചു. ചടങ്ങിന് ശേഷം ആശുപത്രി അങ്കണത്തില്‍ വൃക്ഷത്തൈ നട്ടാണ് മന്ത്രി മടങ്ങിയത്.