പൊന്നാനി: നഗരസഭയിലെ ഉപതെരഞ്ഞെടുപ്പുമായി ബന്ധപ്പെട്ടുള്ള തെരഞ്ഞെടുപ്പ് കമ്മിഷന്റെ നടപടി യു.ഡി.എഫിന്റെ നിയമ പോരാട്ടത്തിനുള്ള അംഗീകാരമാണെന്ന് നേതാക്കള്‍ വാര്‍ത്താസമ്മേളനത്തില്‍ അഭിപ്രായപ്പെട്ടു.
ഒന്നാം വാര്‍ഡായ അഴീക്കലിലെ ഉപതെരഞ്ഞെടുപ്പുമായി ബന്ധപ്പെട്ട് മുന്‍നഗരസഭാ സെക്രട്ടറിയും സൂപ്രïും നിയമവിരുദ്ധ പ്രവര്‍ത്തനങ്ങള്‍ നടത്തിയെന്ന് തെരഞ്ഞെടുപ്പ് കമ്മിഷന് ബോധ്യപ്പെട്ടതിനെത്തുടര്‍ന്ന് ഇരുവരെയും പ്രോസിക്യൂട്ട് ചെയ്യാന്‍ കഴിഞ്ഞ ദിവസം തീരുമാനമായിരുന്നു.
സി.പി.എമ്മിന്റെ ആജ്ഞാനുവര്‍ത്തികളായി മാറിയ ഉദ്യോഗസ്ഥര്‍ക്കുള്ള മുന്നറിയിപ്പാണ് ഈ നടപടി. കഴിഞ്ഞ തദ്ദേശ തെരഞ്ഞെടുപ്പില്‍ തീരദേശ മേഖല ഉള്‍പ്പെടെ പല വാര്‍ഡുകളും സി.പി.എമ്മിന് വിജയിക്കാനായത് ഉദ്യോഗസ്ഥരെ കൂട്ടുപിടിച്ച് വോട്ടര്‍ പട്ടികയില്‍ കൃത്രിമം നടത്തിയാണ് എന്ന യു.ഡി.എഫിന്റെ ആരോപണം ശരിവയ്ക്കുന്നതാണ് തെരഞ്ഞെടുപ്പ് കമ്മിഷന്റെ നടപടി. മുഴുവന്‍ കള്ളത്തരങ്ങള്‍ക്കും നേതൃത്വം നല്‍കിയ നഗരസഭാ ചെയര്‍മാന്‍ തല്‍സ്ഥാനത്ത് തുടരാന്‍ അര്‍ഹനല്ല. സ്വജനപക്ഷപാതവും അഴിമതിയും നിറഞ്ഞ നഗരസഭാ ഭരണസമിതിക്കെതിരേ നിയമ പോരാട്ടം തുടരുമെന്നും യു.ഡി.എഫ് നേതാക്കള്‍ വാര്‍ത്താസമ്മേളനത്തില്‍ പറഞ്ഞു.
വാര്‍ത്താസമ്മേളനത്തില്‍ അഹമ്മദ് ബാഫഖി തങ്ങള്‍, വി.പി ഹുസൈന്‍കോയ തങ്ങള്‍, എം. അബ്ദുല്‍ലത്തീഫ്, യു. മുനീബ്, സി. ഗംഗാധരന്‍ എന്നിവര്‍ പങ്കെടുത്തു.