കൊല്ലങ്കോട്: ചുങ്കപ്പാത അനുവദിക്കില്ലെന്ന് ദേശീയ പാത ഇരകളുടെ ഫോറം. മംഗലംഗോവിന്ദാപുരം റോഡിലെദേശീയപാത വികസനത്തിന്റെ പേരില്‍ കുടിയൊഴിപ്പിക്കുന്നതിനെതിരെ ചേര്‍ന്ന യോഗത്തിലാണ് സമരം ശക്തമാക്കുവാന്‍ തീരുമാനമായത്.
പൊലിസ് പോലുള്ള സംവിധാനങ്ങളെ ഉപയോഗപ്പെടുത്തി ഭീതിയിലാക്കാനുള്ള നീക്കത്തിനെതിരെ സമരങ്ങള്‍ സംഘടിപ്പിക്കും. അയല്‍കൂട്ടങ്ങള്‍, വ്യാപാരികള്‍, വഴിയോര കച്ചവടക്കാര്‍, ചെറുകിട വ്യാപാരികള്‍ എന്നിവരെ സംഘടിപ്പിക്കും. ജനങ്ങളെ തെറ്റിദ്ധരിപ്പിച്ച് അലൈമെറ്റന്റുകളിലൂടെതമ്മിലടിപ്പിക്കാനുള്ള നീക്കങ്ങളെ ജനങ്ങളെ സംഘടിപ്പിച്ച് ചെറുക്കുമെന്നും യോഗത്തില്‍ തീരുമാനമായി.
കുടിയൊഴിപ്പിക്കപ്പെടുന്ന ഇരകളുടെ സംഗമം 29 ന് ഉച്ചക്ക് രണ്ടു മണിക്ക് കൊല്ലങ്കോട് പെന്‍ഷന്‍ ഭവനില്‍ നടക്കും. സംഗമത്തില്‍ പരിസ്ഥിതി പ്രവര്‍ത്തകന്‍ സി.ആര്‍ നീലകണ്ഠന്‍ പങ്കെടുക്കുമെന്ന് സംഘാടകര്‍ പറഞ്ഞു. അന്നു രാവിലെ 11 മണിക്ക് വിത്തനശേരി എല്‍.പി.സ്‌കൂളില്‍ നടക്കുന്ന ഇരകളുടെ സംഗമത്തിലും സി.ആര്‍ നീലകണ്ഠന്‍ പങ്കെടുക്കും.
ദേശീയ പാത ഇരകളുടെ ഫോറം ചെയര്‍മാന്‍ ആറുമുഖന്‍ പത്തിചിറ യോഗത്തില്‍ അധ്യക്ഷനായി. ജനറല്‍ കണ്‍വീനര്‍ വി.പി.നിജാമുദ്ദീന്‍ പ്രമേയം അവതരിപ്പിച്ചു. ബി. ഷൈഖ് മുസ്തഫ, മുഹമ്മദ് ഹനീഫ, അജിത് കൊല്ലങ്കോട്, പ്രദീപ് നെന്മാറ, എന്‍.എം.ഷൈഖ് മുസ്തഫ, എ.സി. അല്‍ഫാറൂഖ് , എന്‍.എച്ച്.താജുദ്ദീന്‍, എന്‍.കെ.ഹസന്‍ മുഹമ്മദ് സംസാരിച്ചു.