തൊടുപുഴ:  ലോക പരിസ്ഥിതി ദിനാചരണം വിവിധ സംഘടനകളുടെ ആഭിമുഖ്യത്തില്‍ ജില്ലയിലെമ്പാടും വൃക്ഷ തൈകള്‍ നട്ടും ശുചീകരണ പ്രവര്‍ത്തനങ്ങളും ബോധവല്‍ക്കരണവും നടത്തി ആചരിച്ചു.  മുസ്‌ലീ ലീഗ് നേതൃത്വത്തില്‍ പട്ടയം കവലയില്‍ സംഘടിപ്പിച്ച പരിപാടിയില്‍ മുനിസിപ്പല്‍ ചെയര്‍പേഴ്‌സണ്‍ സഫിയ ജബ്ബാര്‍ വൃക്ഷതൈ നട്ടു.
മുനിസിപ്പല്‍ കൗണ്‍സിലര്‍മാരായ അഡ്വ സി കെ ജാഫര്‍, ടി കെ അനില്‍കുമാര്‍, എസ് ടി യു സംസ്ഥാന സെക്രട്ടറി പി എസ് അബ്ദുല്‍ ജബ്ബാര്‍  എന്നിവര്‍ നേതൃത്വം നല്‍കി.  ഡിവൈഎഫ്‌ഐ തൊടുപുഴ ബ്ലോക്ക് കമ്മിറ്റിയുടെ  ആഭിമുഖ്യത്തില്‍ 'ജീവനുള്ള ഭൂമിക്കായി യുവതയുടെ കാവല്‍' എന്ന മുദ്രാവാക്യമുയര്‍ത്തി  15 കേന്ദ്രങ്ങളില്‍ ദിനാചരണം സംഘടിപ്പിച്ചു. ബ്ലോക്ക് അതിര്‍ത്തിയില്‍ 1500 വൃക്ഷതൈകളാണ് നട്ടുപിടിപ്പിച്ചത്. ദിനാചരണ പരിപാടി സിപിഎം സംസ്ഥാന കമ്മിറ്റിയംഗം കെ പി മേരി ഉദ്ഘാടനം ചെയ്തു. വെങ്ങല്ലൂരില്‍ നടന്ന ചടങ്ങില്‍ ബ്ലോക്ക് പ്രസിഡന്റ് കെ കെ ഷിംനാസ് അധ്യക്ഷനായി.  മുനിസിപ്പല്‍ കൗണ്‍സിലര്‍മാരായ രാജീവ് പുഷ്പാംഗദന്‍, ബിന്‍സി അലി, ബിജി സുരേഷ്, എം മധു, എം എം റഷീദ് എന്നിവര്‍ സംസാരിച്ചു.
ഡിവൈഎഫ്‌ഐ കരിമണ്ണൂര്‍ മേഖലാ കമ്മിറ്റിയുടെ നേതൃത്വത്തില്‍ നടന്ന ദിനാചരണം പന്നൂരില്‍ സിപിഎം ഏരിയ സെക്രട്ടറി എന്‍ സദാനന്ദന്‍ ഉദ്ഘാടനം ചെയ്തു. സിപിഎം തൊടുപുഴ വെസ്റ്റ് ലോക്കല്‍ കമ്മിറ്റിയുടെ ആഭിമുഖ്യത്തില്‍ തൊടുപുഴ മുനിസിപ്പല്‍ ശ്മാശനവും പരിസരവും ശുചീകരിച്ചു. ലോക്കല്‍ സെക്രട്ടറി കെ ആര്‍ ഷാജി ഉദ്ഘാടനം ചെയ്തു.
തൊടുപുഴയിലെ വെമ്പിള്ളി  ആയുര്‍വേദ ആശുപത്രിയുടെ ആഭിമുഖ്യത്തില്‍ ഔഷധ ഗുണമുള്ള അപൂര്‍വയിനം നെല്‍വിത്തായ രക്തഹാരി വിതച്ചാണ് പരിസ്ഥിതിദാനാചരണം സംഘടിപ്പിച്ചത്. കഴിഞ്ഞ 15 വര്‍ഷമായി രാസ കീടനാശിനി പ്രയോഗം നടത്താത്ത പാടത്തിന് സമീപത്തെ വെമ്പിള്ളി ആശുപത്രിയുടെ നക്ഷത്ര വനത്തിലാണ് പരിപാടി നടത്. ഡോ. മാത്യു വെമ്പിള്ളി 'ആയുര്‍വേദത്തിലൂടെ പ്രകൃതിയിലേക്ക്' എന്ന സന്ദശം നല്‍കി ഉദ്ഘാടനം ചെയ്തു. യോഗത്തില്‍ വാര്‍ഡ് മെമ്പര്‍ ജെറീഷ് ജോസ് അധ്യക്ഷനായി. മികച്ച കര്‍ഷകരായ ബിജോ അഗസ്റ്റിയനെ സാഹിത്യകാരന്‍ മുഹമ്മദ് ബഷീറും ഉമ്മച്ചനെ എഎംഎഐ ജില്ലാ സെക്രട്ടറി ഡോ. നൗഷാദും തങ്കച്ചനെ മുന്‍ സന്തോഷ് ട്രോഫി ഫുട്‌ബോള്‍ താരം പി എ സലിംകുട്ടിയും ആദരിച്ചു.
എന്‍ജിഒ യൂണിയന്റെ നേതൃത്വത്തില്‍ പകര്‍ച്ചവ്യാധി പ്രതിരോധ പ്രവര്‍ത്തനത്തിന്റെ ഭാഗാമയി ജില്ലയില്‍ വിവിധ  േകന്ദ്രങ്ങളില്‍ ശുചീകരണ പ്രവര്‍ത്തനങ്ങള്‍ നടത്തി.  തൊടുപുഴ ഈസ്റ്റ് ഏരിയ കമ്മിറ്റിയുടെ നേതൃത്വത്തില്‍ ജില്ലാ ആശുപത്രിയില്‍ നടത്തിയ ശുചീകരണ പ്രവര്‍ത്തനങ്ങള്‍ മുനിസിപ്പല്‍ കൗണ്‍സിലര്‍ കെ കെ ഷിംനാസ് ഉദ്ഘാടനം ചെയ്തു. യൂണിയന്‍ ഏരിയ പ്രസിഡന്റ് പി എസ് രാജേഷ് ബാബു അധ്യക്ഷനായി.