ആലുവ: ഇന്ത്യന്‍ ബ്ലൈന്റ് ഫുട്‌ബോള്‍ ഫെഡറേഷന്റെ ആഭിമുഖ്യത്തില്‍ കാഴ്ചയുടെ വെല്ലുവിളികള്‍ നേരിടുന്നവര്‍ക്കായി മൂന്നാമത് ദേശീയ ബ്ലൈന്റ് ഫുട്‌ബോള്‍ ടൂര്‍ണമെന്റ് കീഴ്മാട് അന്ധവിദ്യാലയ സ്റ്റേഡിയത്തില്‍ ഇന്ന് മുതല്‍ മെയ് ഒന്ന് വരെ നടക്കും. 12 സംസ്ഥാനങ്ങളില്‍ നിന്നുള്ള ടീമുകള്‍ പങ്കെടുക്കും. ദിവസവും വൈകിട്ട് അഞ്ച് മുതല്‍ മത്സരം ആരംഭിക്കും.
ചിലവന്നൂര്‍ ജോഗോ ഗ്രൗണ്ടില്‍ 30ന് സെമി ഫൈനലും മെയ് ഒന്നിന് ഫൈനലും നടക്കും. മത്സരങ്ങളില്‍ സംസ്ഥാനങ്ങള്‍ക്ക് വേണ്ടി ദേശീയ താരങ്ങളും പങ്കെടുക്കുന്നുണ്ട്. അന്തര്‍ദേശീയ റഫറിമാരാണ് കളി നിയന്ത്രിക്കുക. 2024 ല്‍ നടക്കുന്ന പാരാലിംപിക്‌സിനുള്ള ഇന്ത്യന്‍ ടീമിനെ തയ്യാറാക്കുക എന്ന ലക്ഷ്യത്തോടെയാണ് കാഴ്ചയുടെ വെല്ലുവിളികള്‍ നേരിടുന്നവര്‍ക്കായി കാല്‍പന്ത് മത്സരങ്ങള്‍ തുടര്‍ച്ചയായി രാജ്യത്തിന്റെ പല ഭാഗങ്ങളിലായി സംഘടിപ്പിക്കുന്നതെന്ന് ഇന്ത്യന്‍ ബ്ലൈന്റ് ഫുട്‌ബോള്‍ ഫെഡറേഷന്‍ പ്രതിനിധികള്‍ പറഞ്ഞു.
കേരളത്തില്‍ രണ്ടാം തവണയാണ് ദേശീയ ബ്ലൈന്റ് ഫുട്‌ബോള്‍ മത്സരം നടക്കുന്നത്. കേരള ബ്ലൈന്റ് സ്‌കൂള്‍ സൊസൈറ്റി വൈസ് ചെയര്‍മാന്‍ ഫാ. ജേക്കബ് മണ്ണാപ്രായല്‍ കോര്‍ എപ്പിസ്‌കോപ്പ, വര്‍ക്കിങ് പ്രസിഡന്റ് ടി.ജെ ജോണ്‍, എസ്.ആര്‍.വി.സി ഭാരവാഹി സുനില്‍ കെ മാത്യു, ഗൈഡ് നരേഷ്, കളിക്കാരായ മേഘാലയ താരം ഗബ്രിയേല്‍ നോന്‍ഗ്രൂം, ഹരിയാന താരം അശ്വിനികുമാര്‍, കേരള ഗോള്‍കീപ്പര്‍ പി.എസ് സുജിത്ത് പങ്കെടുത്തു.