കൊല്ലം: ചെങ്ങന്നൂര്‍ ഉപതെരഞ്ഞെടുപ്പില്‍ കേരളാ കോണ്‍ഗ്രസ് (എം) പാര്‍ട്ടിയുടെ പിന്തുണ വേണ്ടെന്ന നിലപാട് ആവര്‍ത്തിച്ച് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍.
ചെങ്ങന്നൂരില്‍ മാണിയുടെ സഹായം എല്‍.ഡി.എഫിന് ആവശ്യമില്ലെന്ന് കാനം പറഞ്ഞു. മാണിയുടെ സഹായം ഇല്ലാതെ തന്നെ ചെങ്ങന്നൂരില്‍ വിജയിക്കാനാകുമെന്ന ആത്മവിശ്വാസം ഇടതുമുന്നണിക്ക് ഉണ്ടെന്നും കാനം മാധ്യമങ്ങളോട് പ്രതികരിച്ചു. ചെങ്ങന്നൂര്‍ ഉപതെരഞ്ഞെടുപ്പ് തീയതി കേന്ദ്രതെരഞ്ഞെടുപ്പ് കമ്മീഷന്‍ പ്രഖ്യാപിച്ചതിന് പിന്നാലെയാണ് നിലപാട് ആവര്‍ത്തിച്ച് കാനം രംഗത്ത് വന്നിരിക്കുന്നത്.
മാണിയുമായുള്ള ബന്ധത്തെ ചൊല്ലി സി.പി.എം - സി.പി.ഐ തര്‍ക്കം രൂക്ഷമാകുമെന്ന സൂചനയാണ് കാനത്തിന്റെ പ്രസ്താവന നല്‍കുന്നത്. മാണിയുടെ പിന്തുണ സ്വീകരിക്കാം എന്ന നിലപാടാണ് സി.പി.എമ്മിനുള്ളത്.
ചെങ്ങന്നൂരില്‍ ഇതിനോടകം തന്നെ തെരഞ്ഞെടുപ്പ് പ്രവര്‍ത്തനങ്ങള്‍ ആരംഭിച്ചിട്ടുണ്ട്. മാണിയുടെ സഹായം ഇല്ലാതെയാണ് കഴിഞ്ഞ തവണ ചെങ്ങന്നൂരില്‍ വിജയിച്ചത്.
ഇത്തവണ സജി ചെറിയാന് വിജയിക്കുന്നതിനും മാണിയുടെ പിന്തുണ ആവശ്യമില്ലെന്നും കാനം വ്യക്തമാക്കി.