ബി.ജെ.പിക്ക് വോട്ട് ചെയ്യാത്തവരുടെ വീടുകളിലേക്ക് തെരെഞ്ഞെടുപ്പ് ഫലം വന്നതിന് ശേഷം ബുള്‍ഡോസറെത്തുമെന്ന് അസം എം.എല്‍.എ. റതാബരിയിലെ ബിജെപി എംഎല്‍എയായ വിജയ് മല്ലകാറാണ് ഇലക്ഷന്‍ ക്യാംപെയ്‌നില്‍ വോട്ടര്‍മാരെ ഭീഷണിപ്പെടുത്തിയത്.കരീംഗഞ്ചിലെ സിറ്റിങ് എം.പിയും ബി.ജെ.പി സ്ഥാനാര്‍ഥിയുമായ കൃപനാഥ് മല്ലയുടെ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു വിജയ് മല്ലകാര്‍. 'ബി.ജെ.പിക്ക് വോട്ട് ചെയ്തില്ലെങ്കില്‍ അതിന്റെ പ്രത്യാഘാതം നേരിടേണ്ടിവരും. ഞങ്ങള്‍ക്ക് വോട്ട് ചെയ്യാത്തവര്‍ക്ക് എന്താണു സംഭവിച്ചതെന്ന് നിങ്ങള്‍ക്ക് അറിയാമല്ലോ.. അവരെ തേടി ബുള്‍ഡോസര്‍ എത്തും'പ്രസംഗത്തില്‍ എം.എല്‍.എ മുന്നറിയിപ്പ് നല്‍കി.

പ്രസംഗത്തിന്റെ വിഡിയോ ദൃശ്യങ്ങള്‍ സോഷ്യല്‍ മീഡിയയില്‍ വൈറലാണ്. ഇതോടെ പ്രതിഷേധവുമായി അസമിലെ പ്രതിപക്ഷ നേതാക്കള്‍ രംഗത്തെത്തിയിട്ടുണ്ട്. വോട്ടര്‍മാരെ ഭീഷണിപ്പെടുത്തി വോട്ട് തട്ടാനാണ് ബി.ജെ.പി ശ്രമമെന്നും ഇതിനെതിരെ നടപടി വേണമെന്നും നേതാക്കള്‍ ചൂണ്ടിക്കാട്ടി. 2019ല്‍ ബിജെപിയുടെ കൃപനാഥ് മല്ലയാണ് എം.പിയായി വിജയിച്ച് ലോക്‌സഭയിലെത്തിയത്.