ആലുവ : സ്വകാര്യ കമ്പനിക്കായുണ്ടാക്കിയ കേബിള്‍കുഴി തിരക്കേറിയ റോഡില്‍ അപകടങ്ങള്‍ക്കു കാരണമാകുന്നു. ആലുവ പാലസ് റോഡില്‍ ബാങ്ക് കവല ബസ്റ്റോപ്പിന് സമീപത്താണ് സ്വകാര്യ ടെലഫോണ്‍ കമ്പനിക്കായി റോഡ് കുഴിച്ചെടുത്ത കേബിള്‍ കുഴി അപകടം വരുത്തുന്നത്.
കേബിള്‍ കുഴി മണ്ണിട്ട് മൂടിയെങ്കിലും, മഴപെയ്തതോടെ മണ്ണ് താഴേക്ക് ഇരുന്നതാണ് കുഴി അപകടത്തിന് കാരണമാകുന്നത്.
കുഴിയിലെ മണ്ണിരുന്നതോടെ കേബിള്‍ സ്ഥാപിച്ച പില്ലര്‍ അടക്കം പുറത്തേക്ക് ഉയര്‍ന്ന നിലയിലാണുള്ളത്.
തിരക്കേറിയ റോഡില്‍ ഇത് ഏറെ അപകടങ്ങള്‍ക്ക് വഴിവയ്ക്കുമെന്നുറപ്പായിട്ടും, അധികൃതര്‍ ഒരു നടപടിയും സ്വീകരിച്ചിട്ടില്ലെന്നാണ് നാട്ടുകാരുടെ പരാതി.