മട്ടാഞ്ചേരി: നെല്ലുകടവ് ഭാഗത്ത് വീണ്ടും കുടിവെള്ള ക്ഷാമം രൂക്ഷം.
മാസങ്ങളോളം കുടിവെള്ള വിതരണം നിലച്ചതിനെ തുടര്‍ന്ന് ഒരു മാസം മുന്‍പ് വീട്ടമ്മമാര്‍ ഫോര്‍ട്ടു കൊച്ചിയേയും, മട്ടാഞ്ചേരിയേയും ബന്ധിപ്പിക്കുന്ന ചുങ്കം പാലം ഉപരോധിക്കുകയും വാട്ടര്‍ അതോരിറ്റി ഉദ്യോഗസ്ഥരെത്തി കുടിവെളളക്ഷാമത്തിന് ചെറിയ തോതില്‍ പരിഹാരമുണ്ടാക്കുകയും ചെയ്തിരുന്നു.എന്നാല്‍ കഴിഞ്ഞ മൂന്ന് ദിവസങ്ങളായി മേഖലയില്‍ കുടിവെള്ള ക്ഷാമം വീണ്ടും രൂക്ഷമായി മാറിയിരിക്കയാണ്.
ചിലയിടങ്ങളില്‍ അരിച്ചെത്തുന്ന വെള്ളത്തിനാകട്ടെ മണവും, ചെളി കലര്‍ന്ന നിറവും കാണപ്പെടുന്നു. റമദാന്‍ മാസമായതിനാല്‍ വീട്ടമ്മമാര്‍ ദുരിതം പേറുകയാണ്. ജലക്ഷാമം പരിഹരിക്കുന്നതിന് അടിയന്തിര നടപടികള്‍ കൈക്കൊള്ളണമെന്നാണ് പ്രദേശവാസികള്‍ ആവശ്യപ്പെടുന്നത്. ഇനിയും തങ്ങളെ സമരത്തിലേക്ക് തള്ളിവിടരുതെന്നും ഇവര്‍ ആവശ്യപ്പെടുന്നു.