നിലമ്പൂര്‍: മരുത തണ്ണിക്കടവ് വനാതിര്‍ത്തിയിലെ വീട്ടില്‍ മൂന്നംഗ മാവോയിസ്റ്റ് സംഘമെത്തി. കരിയംമുരിയം വനത്തോട് ചേര്‍ന്നുള്ള തണ്ണിക്കടവ് കല്ലായിപ്പൊട്ടിയിലെ പനയംതൊടിക റഹ്മാബിയുടെ വീട്ടിലാണ് തിങ്കളാഴ്ച രാത്രി എട്ടരയോടെ ആയുധധാരികളായ മൂന്നുപേര്‍ എത്തിയത്.  രാത്രി എട്ടോടെ സംഘം എത്തുമ്പോള്‍ റഹ്മാബിയുടെ മരുമകളും രണ്ട് വയസുള്ള കുട്ടിയും മാത്രമായിരുന്നു വീട്ടിലുണ്ടായിരുന്നത്. ഭയന്നുവിറച്ച യുവതി പുറത്തുപോയിരുന്ന ഭര്‍ത്താവിനെ ഫോണില്‍ വിളിച്ചുവരുത്തുകയായിരുന്നു. മാവോവാദികളാണെന്ന് പരിചയപ്പെടുത്തിയ ശേഷം കേന്ദ്ര, സംസ്ഥാന സര്‍ക്കാരുകള്‍ക്കും പൊലിസിനുമെതിരേ സംസാരിക്കുകയും, ലഘുലേഖകളും നോട്ടിസും നല്‍കുകയും ചെയ്തു. സംഘത്തിലെ ഒരാളാണ് കാര്യമായി സംസാരിച്ചത്. മൂന്ന് മണിക്കൂറോളം സമയം ഇവരുടെ വീട്ടില്‍ ചിലവഴിച്ച സംഘം അരി, മഞ്ഞള്‍പ്പൊടി, മല്ലിപ്പൊടി, മുളകുപൊടി എന്നിവ വാങ്ങി പിന്നീട് വരാമെന്ന് അറിയിച്ചാണ് മടങ്ങിയത്. കഴിഞ്ഞ ദിവസം മരുത മഞ്ചക്കോട് അങ്ങാടിയില്‍ കണ്ടെത്തിയ 'കനല്‍പാത' ലഘുലേഖയുടെ ഒക്ടോബര്‍ പതിപ്പിന് പുറമെ സെപ്റ്റംബര്‍ പതിപ്പും ഇവിടെ നല്‍കിയ കൂട്ടത്തിലുണ്ട്. വഴിക്കടവ് പൊലിസും നക്‌സല്‍ വിരുദ്ധ സേനയും തമിഴ്‌നാട് ക്യു ബ്രാഞ്ചും സ്ഥലത്തത്തെി വിവരങ്ങള്‍ ശേഖരിച്ചു. വീട്ടുകാര്‍ക്ക് നല്‍കിയ ലഘുലേഖകള്‍ പൊലിസിന് കൈമാറി. അതേസമയം വയനാട് കല്‍പ്പറ്റ സ്വദേശിയും നാടുകാണി ദളത്തിലെ പ്രധാന പ്രവര്‍ത്തകനുമായ സോമന്‍, തമിഴ്‌നാട് പൊള്ളാച്ചി സ്വദേശി സന്തോഷ്, കര്‍ണാടക സ്വദേശി ചന്ദ്രു തുടങ്ങിയവരാണ് തണ്ണിക്കടവിലെത്തിയതെന്ന് പൊലിസ് സ്ഥിരീകരിച്ചു. മാവോവാദികളുടെ ഫോട്ടോ നാട്ടുകാരെയും മറ്റും കാണിച്ചതിന്റെ അടിസ്ഥാനത്തില്‍ ഇവര്‍ തിരിച്ചറിയുകയായിരുന്നു. വന്നവരില്‍ രണ്ടു പേര്‍ നാടന്‍ തോക്കുകളും ഒരാള്‍ യന്ത്രത്തോക്കുമാണ് കൈവശം വച്ചതെന്നും തിരിച്ചറിഞ്ഞിട്ടുണ്ട്. നാലുമണിക്കൂറോളം സമയമാണ് ഇവര്‍ കാടിനു പുറത്ത് ചെലവഴിച്ചത്. രാത്രി എട്ടരക്ക് വന്ന മാവോവാദികള്‍ അര്‍ധരാത്രി 12 മണിക്കാണ് തിരിച്ചുപോയത്. 2015-16 കാലങ്ങളിലാണ് മുന്‍പ് മാവോവാദികള്‍ ഈ പ്രദേശത്ത് വന്നതെന്ന് പൊലിസ്പറഞ്ഞു.