തിരുവനന്തപുരം: മഴക്കാലത്ത് യൂണിഫോമിനൊപ്പം ഷൂസും സോക്‌സും ധരിക്കാന്‍ കുട്ടികളെ നിര്‍ബന്ധിക്കരുതെന്നും അനുയോജ്യമായ ചെരുപ്പോ മറ്റോ അണിഞ്ഞാല്‍ മതിയെന്നും സംസ്ഥാന ബാലാവകാശ സംരക്ഷണ കമ്മിഷന്‍ നിര്‍ദേശിച്ചു. ഇക്കാര്യം വ്യക്തമാക്കി സംസ്ഥാനത്തെ മുഴുവന്‍ സ്‌കൂള്‍ അധികൃതര്‍ക്കും നിര്‍ദേശം നല്‍കണമെന്ന്  പൊതുവിദ്യാഭ്യാസ സെക്രട്ടറി, ഡയറക്ടര്‍, സി.ബി.എസ്.ഇയുടെ തിരുവനന്തപുരത്തെ റീജിയണല്‍ ഓഫിസര്‍ എന്നിവരോട് കമ്മിഷന്‍ ആവശ്യപ്പെട്ടു. വിഷയത്തില്‍ സ്വീകരിച്ച നടപടി പത്തുദിവസത്തിനകം അറിയിക്കണമെന്നും കമ്മിഷന്‍ അധ്യക്ഷ ശോഭാ കോശി, അംഗം കെ.നസീര്‍ എന്നിവരടങ്ങിയ ഡിവിഷന്‍ ബെഞ്ച് ആവശ്യപ്പെട്ടിട്ടുണ്ട്.
നനഞ്ഞ ഷൂസും സോക്‌സുമായി ദിവസം മുഴുവന്‍ ക്ലാസില്‍ ഇരിക്കേണ്ടിവരുന്നത് കുട്ടികള്‍ക്ക് അസുഖത്തിന് കാരണമാകുന്നുവെന്നും മഴക്കാലത്ത് ഷൂസും സോക്‌സും ഒഴിവാക്കണമെന്നും ആവശ്യപ്പെട്ട് ഒരു രക്ഷകര്‍ത്താവ് നല്‍കിയ പരാതി പരിഗണിച്ചാണ് കമ്മിഷന്റെ ഉത്തരവ്.