ന്യൂഡല്‍ഹി: ഇന്ത്യക്കാരെ പോലെ നിഷ്‌കളങ്കരെ താന്‍ എവിടേയും കണ്ടിട്ടില്ലെന്ന് മുന്‍ കേന്ദ്രമന്ത്രിയും കോണ്‍ഗ്രസ് നേതാവുമായ പി.ചിദംബരം. കേന്ദ്ര സര്‍ക്കാരിന്റെ എല്ലാ അവകാശവാദങ്ങളും ഇന്ത്യന്‍ ജനത വിശ്വസിക്കുകയാണെന്നും അദ്ദേഹം പറഞ്ഞു.

പത്രങ്ങളില്‍ എന്ത് വന്നാലും നാം അത് വിശ്വസിക്കും. എന്ത് വന്നാലും വിശ്വസിക്കുന്ന ജനവിഭാഗമായി നാം മാറിയിട്ടുണ്ട്. രാജ്യത്തെ എല്ലാ ഗ്രാമങ്ങളിലുെ വൈദ്യുതി എത്തിയെന്നും 99 ശതമാനം ജനങ്ങള്‍ക്കും കക്കൂസ് ലഭ്യമാക്കിയെന്നുമുള്ള മോദി സര്‍ക്കാരിന്റെ അവകാശവാദങ്ങള്‍ ജനങ്ങള്‍ വിശ്വസിച്ചുവെന്നും ചിദംബരം പറഞ്ഞു.

ആയുഷ്മാന്‍ ഭാരത് പദ്ധതിയുടെ കാര്യത്തിലും ഇതാണ് സ്ഥിതി. ഡല്‍ഹിയിലെ ഒരു ഡ്രൈവറുടെ പിതാവിന്റെ ചികിത്സയ്ക്കായി ആയുഷ്മാന്‍ ഭാരത് കാര്‍ഡ് ഉപയോഗപ്പെടുത്തുവാന്‍ ഞാന്‍ ആവശ്യപ്പെട്ടു. എന്നാല്‍ ആ പദ്ധതിയെക്കുറിച്ചു പോലും ആശുപത്രി അധികൃതര്‍ക്ക് അറിവുണ്ടായിരുന്നില്ല. എന്നാല്‍ ആയുഷ്മാന്‍ കാര്‍ഡ് പദ്ധതി ഇന്ത്യയില്‍ എല്ലായിടത്തും നടപ്പിലായെന്നാണ് ഇന്ത്യക്കാര്‍ എല്ലാവരും വിശ്വസിക്കുന്നതെന്നും ചിദംബരം കൂട്ടിച്ചേര്‍ത്തു.