മെല്‍ബണ്‍: ആസ്‌ത്രേലിയയിലെ മെല്‍ബണിലെ ഷോപ്പിങ് കോംപ്ലക്‌സിലേക്ക് ചെറുവിമാനം ഇടിച്ചിറങ്ങ് അഞ്ചു പേര്‍ മരണപ്പെട്ടു. കിങ് എയര്‍ക്രാഫ്റ്റിന്റെ ചാര്‍ട്ടേഡ് വിമാനമായ ബീച്ച് ക്രാഫ്റ്റ് ബി 200 ആണ് തകര്‍ന്നുവീണത്. സംഭവത്തില്‍ വിമാനത്തിലുണ്ടായിരുന്ന അഞ്ചു പേരും മരണപ്പെട്ടതായി അധികൃതര്‍ അറിയിച്ചു. മെല്‍ബണിലെ എസന്‍ഡണ്‍ എയര്‍പോര്‍ട്ടിനു സമീപത്തെ ഡി.ഫ്.ഒ ബില്‍ഡിങ്ങിലേക്കാണ് വിമാനം ഇടിച്ചിറങ്ങിയത്.

മെല്‍ബണിലെ എസന്‍ഡണ്‍ എയര്‍പോര്‍ട്ടില്‍ നിന്നും പറന്നുയര്‍ന്ന ഉടനെയായിരുന്നു ദുരന്തം. എന്‍ജിന്‍ പ്രവര്‍ത്തനിത്തില്‍ നേരിട്ട തകരാറാണ് ദുരന്തത്തിന് കാരണമെന്ന് വിക്ടോറിയ പോലിസ് അസിസ്റ്റന്റ് കമ്മീഷണര്‍ സ്റ്റീഫന്‍ ലെയ്ന്‍ പറഞ്ഞു. ടാസ്മാനിയയിലെ കിങ് ഐലന്‍ഡിലേക്കായിരുന്നു വിമാനം പുറപ്പെട്ടത്. അപകട സമയത്ത് ഷോപ്പിങ് കോംപ്ലക്‌സ് തുറന്നിരുന്നില്ല.

പ്രാദേശിക സമയം രാവിലെ ഒമ്പതിനായിരുന്നു അപകടം. അപകടത്തെ കുറിച്ച് അന്വേഷിക്കുമെന്ന് ആസ്‌ത്രേലിയന്‍ ട്രാന്‍സ്‌പോര്‍ട്ട് സെഫ്റ്റി ബ്യൂറോ പറഞ്ഞു. ഇരട്ട എന്‍ജിനുള്ള വിമാനമാണ് ബീച്ച്ക്രാഫ്റ്റ് ബി 200.