മുംബൈ: പശുവിനെ സ്പര്‍ശിക്കുന്നതിലൂടെ നെഗറ്റിവിറ്റിയെ അകറ്റിനിര്‍ത്താനാവുമെന്ന് മഹാരാഷ്ട്രയിലെ കോണ്‍ഗ്രസ് മന്ത്രി യശോമതി ഠാക്കൂര്‍. അമരാവതിയില്‍ സംഘടിപ്പിച്ച യോഗത്തിലായിരുന്നു യശോമതി ഠാക്കൂര്‍ പശുവിനെ സ്പര്‍ശിച്ചാലുള്ള ഗുണത്തെക്കുറിച്ച് പരാമര്‍ശിച്ചത്.

നിങ്ങള്‍ ഒരു പശുവിനെ സ്പര്‍ശിക്കുകയാണെങ്കില്‍ നിഷേധാത്മകതയെ അകറ്റി നിര്‍ത്താനാകുമെന്നും ഇത് നമ്മുടെ സംസ്‌കാരത്തിന്റെ ഭാഗമായി പറയുന്നുണ്ടെന്നുമായിരുന്നു മന്ത്രിയുടെ പരാമര്‍ശം. എന്നാല്‍ പരാമര്‍ശം വാര്‍ത്തയായതോടെ ഇക്കാര്യത്തില്‍ അവര്‍ കൂടുതല്‍ വിശദീകരണം നല്‍കി. 'പശു ഒരു ദൈവികമായ മൃഗമാണ്. ഇനി പശുവോ അല്ലെങ്കില്‍ ഏത് മൃഗമോ ആയിക്കോട്ടെ, അവരെ സ്പര്‍ശിക്കുന്നിലൂടെ സ്‌നേഹം അനുഭവിക്കാം.' ഇതുതന്നെയാണ് താന്‍ പറഞ്ഞതെന്നും അതില്‍ എന്താണ് തെറ്റെന്നും മന്ത്രി ചോദിച്ചു.

മഹാരാഷ്ട്രയിലെ വനിതാ ശിശുക്ഷേമ വകുപ്പ് മന്ത്രിയായ യശോമതി ഠാക്കൂര്‍ കഴിഞ്ഞദിവസം ജില്ലാ പരിഷത്ത് തിരഞ്ഞെടുപ്പുമായി ബന്ധപ്പെട്ടും വിവാദ പരാമര്‍ശം നടത്തിയിരുന്നു.