കൊച്ചി: മൂന്നാം ക്ലാസ് വിദ്യാര്‍ഥിനിയെ പീഡിപ്പിച്ച കേസില്‍ സി.പി.എം മുന്‍ ബ്രാഞ്ച് സെക്രട്ടറി പൊലിസില്‍ കീഴടങ്ങി. വല്ലാര്‍പാടം പനമ്പുകാട് പുന്നക്കാട്ടില്‍ വീട്ടില്‍ ഷഗി (43) യാണ് സെന്‍ട്രല്‍ സി.ഐ അനന്തലാലിനു മുന്നില്‍ കീഴടങ്ങിയത്.ഷഗി ഹൈക്കോടതിയില്‍ സമര്‍പ്പിച്ച മുന്‍കൂര്‍ ജാമ്യാപേക്ഷ തള്ളിയിരുന്നു.

ഇതിനു പിന്നാലെയാണ് ഇയാള്‍ പൊലിസിനു മുന്നില്‍ കീഴടങ്ങിയത്. പ്രതിയെ ജനറല്‍ ആശുപത്രിയില്‍ എത്തിച്ച് വൈദ്യപരിശോധന നടത്തി. എറണാകുളം ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി 14 ദിവസത്തേക്ക് റിമാന്‍ഡ് ചെയ്തു.

കഴിഞ്ഞ രണ്ടാം തിയതിയാണ് മൂന്നാം ക്ലാസ് വിദ്യാര്‍ഥിനി പീഡനത്തിനിരയായത്. സ്‌കൂളില്‍ എത്തിയ ഷഗി മറ്റു കുട്ടികളൊന്നും ഇല്ലാതിരുന്ന സമയത്ത് പെണ്‍കുട്ടിയെ പീഡിപ്പിച്ചെന്നാണ് കേസ്. സംഭവം പുറത്തറിഞ്ഞ ശേഷം ഒളിവില്‍ പോയ പ്രതിയുടെ സ്‌കൂട്ടര്‍ സൗത്ത് റെയില്‍വേ സ്റ്റേഷന്‍ കോമ്പൗണ്ടില്‍ പ്രതിയുടെ ബന്ധു താമസിച്ചുവരുന്ന ക്വാര്‍ട്ടേഴ്‌സില്‍ നിന്നു പോലിസ് കസ്റ്റഡിയില്‍ എടുത്തിരുന്നു.
പ്രതി മൂന്നാര്‍, പീച്ചി ഭാഗങ്ങളില്‍ ഉണ്ടെന്ന സൂചന ലഭിച്ചതിനെ തുടര്‍ന്ന് ഇവിടങ്ങളിലും പോലിസ് സംഘം എത്തിയിരുന്നെങ്കിലും പിടികൂടാനായിരുന്നില്ല. സംഭവത്തില്‍ വ്യാപക പ്രതിഷേധം ഉയര്‍ന്നിരുന്നു.