കാലിഫോര്‍ണിയ: മെസേജിങ് ആപ്പായ വാട്‌സ്ആപ്പില്‍ പുതിയ സവിശേഷതകള്‍ വരുന്നു. സ്‌നാപ്ചാറ്റിന് സമാനമായി പുതിയ സ്റ്റാറ്റസ് ഫീച്ചര്‍ അവതരിപ്പിക്കുമെന്ന് വാട്‌സ്ആപ്പ് പ്രഖ്യാപിച്ചു. ഇനി യൂസര്‍മാര്‍ക്ക് വാട്‌സ്ആപ്പ് വഴി ഇമേജുകളോ വിഡിയോകളോ നല്‍കാം.
സ്റ്റാറ്റസില്‍ ഇമേജുകളും വിഡിയോകളും താല്‍ക്കാലികമായി മാത്രമേ അപ്‌ലോഡ് ചെയ്യാന്‍ സാധിക്കൂ. 24 മണിക്കൂര്‍ കഴിഞ്ഞാല്‍ ഇമേജ്,വിഡിയോ ജിഫ് സ്റ്റാറ്റസ് അപ്രത്യക്ഷമാകും. സ്‌നാപ്ചാറ്റിന്റെ ജനപ്രിയമായ സ്റ്റോറീസ് ഫീച്ചറിന് സമാനമാണ് ഇത്.
പരീക്ഷണാടിസ്ഥാനത്തില്‍ ഇത് നടപ്പിലാക്കാനാണ് ലക്ഷ്യമിടുന്നത്. ആദ്യം യൂറോപ്പിലാകും ഇത് നടപ്പിലാക്കുക. ആന്‍ഡ്രോയിഡ്,ഐ.ഒ.എസ്. വിന്‍ഡോസ് ഡിവൈസുള്ളവര്‍ക്ക് ഫീച്ചര്‍ ലഭ്യമാകും.
നേരത്തെ ഇന്‍സ്റ്റഗ്രാമും ഈ ഫീച്ചര്‍ ഉള്‍പ്പെടുത്തിയിരുന്നു. ഫേസ്ബുക്ക് മെസഞ്ചറിലും സ്റ്റോറീസ് ഫീച്ചര്‍ ലഭ്യമാണ്. ചാറ്റ്‌സ്, കോള്‍സ് ടാബുകള്‍ക്കിടയില്‍ സ്റ്റാറ്റസ് എന്ന പുതിയ ടാബ് കൂടി വരുമെന്നതാണ് ഈ ഫീച്ചറന്റെ പ്രത്യേകതകളിലൊന്ന്.
സ്റ്റാറ്റസ് പോസ്റ്റ് ചെയ്യുക അതിവേഗം സാധ്യമാകും. സ്റ്റാറ്റസ് ആരെല്ലാം കാണണമെന്നത് ഇനി യൂസര്‍ക്ക് തീരുമാനിക്കാം. വാട്‌സ്ആപ്പിന്റെ എട്ടാം വാര്‍ഷിക ദിനമായ ഫെബ്രുവരി 24നാണ് ഈ ഫീച്ചറിന്റെ ലോഞ്ചിങ്.