പത്താംക്ലാസ് വിദ്യാര്‍ഥികള്‍ക്കുള്ള മോഡല്‍ പരീക്ഷ ഇന്നലെ അവസാനിച്ചു. ഇനി പരീക്ഷകളുടെ മാര്‍ച്ച്. ഒന്നാം ക്ലാസ് മുതല്‍ ബിരുദ തലംവരെയുള്ള വിദ്യാര്‍ഥികള്‍ക്ക് കൂട്ടത്തോടെ പരീക്ഷയെത്തുന്ന സമയാണിത്.
എസ്.എസ്.എല്‍.സി പരീക്ഷയുടെ ഭാഗമായുള്ള ഐ.ടി പ്രാക്ടിക്കല്‍ പരീക്ഷ ഇന്നു തുടങ്ങും. മാര്‍ച്ച് നാലിനാണ് ഐ.ടി പ്രാക്ടിക്കല്‍ അവസാനിക്കുക. ഒന്നുമുതല്‍ ഒന്‍പതുവരെയുള്ള ക്ലാസുകളിലെ കുട്ടികളുടെ വാര്‍ഷിക പരീക്ഷ രണ്ടുഘട്ടങ്ങളിലായാണ് നടക്കുന്നത്. ഹൈസ്‌കൂളിനോട് ചേര്‍ന്ന് ഒന്നുമുതല്‍ ഏഴുവരെ ക്ലാസുള്ള സ്ഥലങ്ങളിലും എട്ട്, ഒന്‍പത് ക്ലാസുകളിലും മാര്‍ച്ച് ഒന്നിനു തുടങ്ങുന്ന പരീക്ഷ ആറുവരെയും പിന്നീട് 28 മുതല്‍ 30 വരെയുമാണ്. യു.പി സ്‌കൂളുകളില്‍ മാര്‍ച്ച് 22 മുതല്‍ 30 വരെയാണ് പരീക്ഷ. മാപ്പിള സ്‌കൂളുകളില്‍ ഏപ്രില്‍ 20നു തുടങ്ങുന്ന പരീക്ഷ 27നു തീരും. പ്ലസ്‌വണ്‍, പ്ലസ്ടു, കാലിക്കറ്റ് യൂനിവേഴ്‌സിറ്റിയുടെ ഡിഗ്രി ആറാം സെമസ്റ്റര്‍ പരീക്ഷകളും മാര്‍ച്ചിലാണ് നടക്കുന്നത്.