മലപ്പുറം: പട്ടിക്കാട് ജാമിഅ നൂരിയ്യ സമ്മേളനത്തില്‍ നിന്ന് ഇന്ന് സനദ് സ്വീകരിക്കുന്ന കണ്ണാടിപറമ്പ് നൂഞ്ചേരി സ്വദേശി സഫ്‌വാന് ഇത് ഇരട്ട നേട്ടത്തിന്റെ മധുരം.
ഫൈസി ബിരുദത്തോടൊപ്പം എം.ടെക്കും പൂര്‍ത്തീകരിച്ചാണ് ഈ യുവ പണ്ഡിതന്‍ വിജയഗാഥ തീര്‍ക്കുന്നത്. എസ്.എസ്.എല്‍.സിയിലും പ്ലസ്ടു പരീക്ഷയിലും ഉയര്‍ന്ന മാര്‍ക്കുനേടിയാണ് വിജയ കുതിപ്പ് തുടങ്ങിയത്.
പട്ടിക്കാട് എം.ഇ.എ.എന്‍ജിനീയറിങ് കോളജില്‍ നിന്നാണ് ബി.ടെക്ക് പൂര്‍ത്തീകരിച്ചത്. തുര്‍ന്ന് തമിഴ്‌നാട് അണ്ണാ യൂനിവേഴ്‌സിറ്റിയില്‍ നിന്ന് എം.ടെക്കും പൂര്‍ത്തീകരിച്ചു. വേങ്ങൂര്‍ നെല്ലികുന്ന് ജലാലിയ്യ ജുമാമസ്ജിദില്‍ മുഹമ്മദ് കുട്ടി ദാരിമിക്കുകീഴില്‍ പള്ളി ദര്‍സ് പഠനം പൂര്‍ത്തീകരിച്ച ശേഷമാണ് പട്ടിക്കാട് ജാമിഅ നൂരിയ്യയില്‍ മത ബിരുദ പഠനത്തിനായി ചേര്‍ന്നത്.
സമന്വയ പഠനത്തിന്റെ പ്രസക്തി തിരിച്ചറിഞ്ഞ മാതാപിതാക്കളുടെയും ഗുരുനാഥന്‍ മുഹമ്മദ്കുട്ടി ദാരിമിയുടെയും പ്രോത്സാഹനവും പ്രാര്‍ഥനയുമാണ് ഈ നേട്ടത്തിനുപിന്നിലെന്ന് സഫ്‌വാന്‍ പറഞ്ഞു. നിലവില്‍ ഇതേ പള്ളി ദര്‍സിലെ രണ്ടാം മുദരിസായി ജോലി ചെയ്യുകയാണ് സഫ്‌വാന്‍. കെ.ടി നൂറുദ്ദീന്‍, കൊളപ്പാല നസീമ ദമ്പതികളുടെ മകനാണ്. മുഹമ്മദ് സയ്ഫീയ്യ്, ഫാത്തിമ സഹോദരങ്ങളാണ്.