കാസര്‍കോട്: പൊവ്വല്‍ എല്‍.ബി.എസ് എന്‍ജിനിയറിങ് കോളജില്‍ എം.എസ്.എഫ്-എസ്.എഫ്.ഐ പ്രവര്‍ത്തകര്‍ തമ്മില്‍ സംഘര്‍ഷം. നാലു പേര്‍ക്കു പരുക്കേറ്റു. എം.എസ്.എഫ് പ്രവര്‍ത്തകരായ മുസ്തഫ(20), ഫവാസ്(20), റാഷിദ്(20) എന്നിവരെ പരുക്കുകളോടെ കാസര്‍കോട് ജനറല്‍ ആശുപത്രിയിലും എസ്.എഫ്.ഐ പ്രവര്‍ത്തകന്‍ ഭമേഷി(24)നെ കാഞ്ഞങ്ങാട്ടെ ജില്ലാ ആശുപത്രിയിലും പ്രവേശിപ്പിച്ചു. ഇന്നലെ രാവിലെയാണു കോളജില്‍ വിദ്യാര്‍ഥികള്‍ തമ്മില്‍ സംഘര്‍ഷമുണ്ടായത്.
രാവിലെ കോളജിലെത്തിയ എം.എസ്.എഫ് പ്രവര്‍ത്തകരെ ക്ലാസ് മുറിയില്‍ കയറാന്‍ അനുവദിക്കാതെ എസ്.എഫ്.ഐ പ്രവര്‍ത്തകര്‍ ക്രൂരമായി മര്‍ദിക്കുകയായിരുന്നുവെന്നു എം.എസ്.എഫ് പ്രവര്‍ത്തകര്‍ ആരോപിച്ചു. കെ.എസ്.യു പ്രവര്‍ത്തകരെയും എസ്.എഫ്.ഐക്കാര്‍ തടഞ്ഞതായി പരാതിയുണ്ട്. കോളജില്‍ കണ്ണൂര്‍ സര്‍വകലാശാല കലോത്സവം നടന്നതിനു പിന്നാലെ കഴിഞ്ഞ ദിവസം രാത്രി മുതല്‍ കോളജിലെ വിദ്യാര്‍ഥികളുടെ വാട്ട്‌സ്ആപ്പ് ഗ്രൂപ്പില്‍ തര്‍ക്കമുണ്ടായിരുന്നു. ഈ പ്രശ്‌നത്തിന്റെ തുടര്‍ച്ചയായാണ് കോളജില്‍ നടന്ന സംഘര്‍ഷമെന്നു കരുതുന്നു. വിവരമറിഞ്ഞ് ആദൂര്‍ പൊലിസ് സ്ഥലത്തെത്തി.