ഗുരുവായൂര്‍: ജില്ലയിലെ വിവിധയിടങ്ങളില്‍ വാഹനമോഷണങ്ങള്‍ പതിവാക്കിയ മോഷ്ടാവിനെ ഗുരുവായൂര്‍ ടെമ്പിള്‍ പൊലിസ് അറസ്റ്റുചെയ്തു. കുന്ദംകുളം അഞ്ഞൂര്‍ സ്വദേശി തേറോപ്പിള്ളിവീട്ടില്‍ കൂറാച്ചി അനൂപിനേയാണ് (29) തൃശ്ശൂര്‍ സിറ്റിപൊലിസ് കമ്മീഷണര്‍ ടി നാരായണന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ഗുരുവായൂര്‍ അസി. പൊലിസ് കമ്മീഷണര്‍ പി ശിവദാസന്റെ നിര്‍ദ്ദേശപ്രകാരം തൃശ്ശൂര്‍ സിറ്റി ഷാഡോ പൊലിസും ഗുരുവായൂര്‍ ടെമ്പിള്‍ സി.ഐ എന്‍ രാജേഷ്‌കുമാറും, എസ്.ഐ സുരേന്ദ്രന്‍ മുല്ലശ്ശേരിയും, സംഘവും മമ്മിയൂര്‍ ലിറ്റില്‍ ഫ്‌ളവര്‍ കോണ്‍വെന്റിന് സമീപംവെച്ച് ഇന്നലെ രാവിലെ അറസ്റ്റു ചെയ്തത്. ഇയാള്‍ ഗുരുവായൂരില്‍ നിന്ന് രണ്ടുബൈക്കും, വിയ്യൂര്‍, പുഴക്കല്‍, പൂങ്കുന്നം എന്നിവിടങ്ങളില്‍ നിന്നുമായി ഓരോ ബൈക്കും അടക്കം അഞ്ചു മോട്ടോര്‍ബൈക്കുകള്‍ മോഷണം നടത്തിയിരുന്നതായും, ഇയാള്‍ക്കെതിരെ കുന്ദംകുളം, പേരാമംഗലം, തൃശ്ശൂര്‍ ടൗണ്‍വെസ്റ്റ് എന്നീ സ്റ്റേഷനുകളില്‍ വാഹനമോഷണ കേസുകള്‍ നിലവിലുണ്ടെന്നും പൊലിസ് പറഞ്ഞു. പ്രതി മോഷ്ടിച്ചെടുത്ത അഞ്ചുബൈക്കുകളും പൊലിസ് പലയിടങ്ങളില്‍ നിന്നുമായി കണ്ടെടുത്തു. മുമ്പ് വാഹനമോഷണ കേസുകളില്‍ പിടിക്കപ്പെട്ട് ജയില്‍വാസം അനുഭവിച്ച് ജാമ്യത്തിലിറങ്ങിയ പ്രതി സ്വകാര്യ ബസ്സ് ജീവനക്കാരനായി ജോലിചെയ്യുകയായിരുന്നു. ഷാഡോ പൊലിസ് എസ്.ഐമാരായ എം.പി. ഡേവീസ്, വി.കെ. അന്‍സാര്‍, എ.എസ്.ഐമാരായ എം.ജി. സുവ്രതകുമാര്‍, പി.എം. റാഫി, സീനിയര്‍ സിവില്‍ പൊലിസ് ഓഫീസര്‍ കെ. ഗോപാലകൃഷ്ണന്‍, സിവില്‍ പൊലിസ് ഓഫീസര്‍മാരായ പി.കെ. പഴനിസ്വാമി, ടി.വി. ജീവന്‍, എം.എസ്. ലിഖേഷ്, കെ.ബി. വിപിന്‍ദാസും, ഗുരുവായൂര്‍ ടെമ്പിള്‍ പൊലിസ് സ്റ്റേഷനിലെ സീനിയര്‍ സിവില്‍ പൊലിസ് ഓഫീസര്‍ പി.എസ്. അനില്‍കുമാര്‍, സിവില്‍ പൊലിസ് ഓഫീസര്‍ കെ.വി. വിജിത്, പി.യു. ഷീജ എന്നിവരും പ്രതിയെ പിടികൂടിയ സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയ റിമാന്റ് ചെയ്തു.