ശ്രീനഗര്‍: ജമ്മുകശ്മീരിലെ ഷോപിയാനയില്‍ തീവ്രവാദികളുടെ ഭീകരാക്രമണത്തില്‍ മൂന്നു സൈനികനും ഒരു പ്രദേശവാസിയുമുള്‍പ്പെടെ നാലു പേര്‍ മരിച്ചു.
ആക്രമണത്തില്‍ മറ്റു നാലു സൈനികര്‍ക്ക് പരുക്കേറ്റിട്ടുണ്ട്. പട്രോളിങ്ങിലുണ്ടായിരുന്ന സൈനികര്‍ക്കു നേരെയാണ് തീവ്രവാദികള്‍ ആക്രമണം നടത്തിയത്.

ഇന്ന് പുലര്‍ച്ചെ 2.30ഓടെയാണ് സംഭവം. സൈന്യം ഉടന്‍ തന്നെ തിരിച്ചടിക്കാന്‍ ശ്രമം നടത്തിയെങ്കിലും തീവ്രവാദികള്‍ രക്ഷപ്പെടുകയായിരുന്നു. ഭീകരരും സൈന്യവും തമ്മില്‍ ഏറ്റുമുട്ടല്‍ നടക്കുന്നതിനിടെ പ്രദേശവാസിയായ സ്ത്രീയാണ് വെടിയേറ്റ് മരിച്ചത്.

ജാന ബഗന്‍ എന്ന സ്ത്രീക്കാണ് തന്റെ വീട്ടിനുള്ളിലേക്ക് തുളച്ചു കയറിയ വെടിയുണ്ടയേറ്റ് മരിച്ചത്. കഴിഞ്ഞ മൂന്നാഴ്ച്ചക്കിടെ നടന്ന നാലാമത്തെ പ്രധാന ഭീകരാക്രമമാണിത്. നേരത്തെ മൂന്ന് ഏറ്റുമുട്ടലുകളിലായി ആറ് സൈനികര്‍ ഇവിടെ കൊല്ലപ്പെട്ടിരുന്നു.