കൊല്ലം: അയ്യപ്പ ദര്‍ശനത്തിനായുള്ള ഏഴംഗ റോളര്‍ സ്‌കേറ്റിങ് സംഘത്തിന്റെ ശബരിമല സ്‌കേറ്റിങ് യാത്ര കൊല്ലത്ത്‌നിന്നു ആരംഭിച്ചു. സ്‌പോര്‍ട്‌സിലൂടെ ആരോഗ്യം നേടൂ ജീവിതശൈലീ രോഗങ്ങള്‍ ഒഴിവാക്കൂ, മതസൗഹാര്‍ദ, ശുചിത്വകേരളം, സുന്ദര കേരളം എന്നീ സന്ദേശവുമായിട്ടാണ് ഇന്നലെ രാവിലെ ഇരുമുടിക്കെട്ടുമായി സംഘം യാത്ര പുറപ്പെട്ടത്.
കലക്ടറേറ്റിനടുത്തുള്ള കൊട്ടാരക്കുളം ഗണപതി ക്ഷേത്രത്തിനു മുന്നില്‍ കോര്‍പറേഷന്‍ കായിക വിദ്യാഭ്യാസ സ്ഥിരസമിതി അധ്യക്ഷന്‍ ടി.ആര്‍ സന്തോഷ്‌കുമാര്‍ ഫ്‌ളാഗ് ഓഫ് ചെയ്തു.  ഹൈസ്‌കൂള്‍ കവല, അഞ്ചാലുംമൂട്, പെരിനാട്, കുണ്ടറ, കൊട്ടാരക്കര ഗണപതി ക്ഷേത്രം, അടൂര്‍ വഴി പത്തനംതിട്ടയിലെത്തി കവലയിലെ ഗാന്ധി പ്രതിമയ്ക്ക് മുന്നില്‍ പുഷ്പാര്‍ച്ചന നടത്തിയ ശേഷം സന്ധ്യയോടെ സ്‌കേറ്റിങ് സംഘത്തിന്റെ യാത്ര റാന്നി പെരുനാട്ടു എത്തിച്ചേര്‍ന്നു. ഇന്നു രാവിലെ പെരുനാട്ട്‌നിന്നു പുറപ്പെടുന്ന യാത്ര ളാഹ വഴി വൈകിട്ടോടെ പമ്പയില്‍ സമാപിക്കും. തുടര്‍ന്ന് സ്‌കേറ്റിങ് താരങ്ങള്‍ കാല്‍നടയായി ശബരിമല സന്നിധിയിലേക്ക് പോകും. ഉദ്യോഗസ്ഥരും വിദ്യാര്‍ഥികളും പ്രൊഫഷണലുകളും കായികതാരങ്ങളുമടങ്ങുന്ന സംഘത്തില്‍ പി.ആര്‍ ബാലഗോപാല്‍, എസ്. ബിജു, അനുരാജ് പൈങ്ങാവില്‍, ടി.എസ് ആദര്‍ശ്, ബി.ജി. ബാല്‍ശ്രേയസ്, സിബി സുകുമാരന്‍, നിതിന്‍ രാജ് എന്നിവരാണുള്ളത്.