തിരുവനന്തപുരം: മോട്ടോര്‍ വാഹന നിയമലംഘനത്തിന് പിഴത്തുക കുറച്ച കേരളത്തിന്റെ നടപടി കേന്ദ്രം ശരിവച്ചു. സംസ്ഥാനത്തിന്റെ തീരുമാനം അംഗീകരിച്ചതായി ചൂണ്ടിക്കാട്ടി കേന്ദ്രമന്ത്രി നിതിന്‍ ഗഡ്കരി കേരളത്തിന് കത്ത് നല്‍കി.
മോട്ടോര്‍ വാഹന നിയമ ഭേദഗതിക്കെതിരേ ശക്തമായ പ്രതിഷേധങ്ങള്‍ രാജ്യമെങ്ങും ഉയര്‍ന്നിരുന്നു. തുടര്‍ന്ന് കേരളം ഉള്‍പ്പടെയുള്ള പല സംസ്ഥാനങ്ങളും പിഴത്തുകയില്‍ കുറവുവരുത്തുകയായിരുന്നു. ഗതാഗത നിയമലംഘനങ്ങള്‍ക്കുള്ള പിഴയില്‍ ഇളവുവരുത്താന്‍ അനുവദിക്കില്ലെന്ന് തുടക്കത്തില്‍ കേന്ദ്രസര്‍ക്കാര്‍ നിലപാടെടുത്തു. ഒരു സംസ്ഥാനം മാത്രം പിഴ കുറച്ചത് അംഗീകരിക്കില്ലെന്നും കേന്ദ്രം വ്യക്തമാക്കിയിരുന്നു. തുടര്‍ന്ന് സംസ്ഥാനത്തിന്റെ ബുദ്ധിമുട്ടുകള്‍ ചൂണ്ടിക്കാട്ടി കേരളം കേന്ദ്രമന്ത്രിക്ക് കത്തയക്കുകയായിരുന്നു. തുടര്‍ന്നാണ് മന്ത്രി മറുപടിക്കത്ത് നല്‍കിയത്.
ഗതാഗത നിയമലംഘനങ്ങള്‍ക്കുള്ള പിഴ പത്തിരട്ടിയോളം കൂട്ടിയ നിയമഭേദഗതി വന്നയുടന്‍ കേരളം വിജ്ഞാപനം പുറത്തിറക്കിയിരുന്നു.
ഉയര്‍ന്ന പിഴ ഈടാക്കുന്നതില്‍ പ്രതിഷേധം ശക്തമായതോടെ ഇടക്കാലത്ത് വാഹന പരിശോധന തന്നെ നിര്‍ത്തിവയ്ക്കുകയും ചെയ്തു. പിന്നീടാണ് മോട്ടോര്‍ വാഹന പിഴയിലെ ഭേദഗതിക്ക് സംസ്ഥാന മന്ത്രിസഭ അംഗീകാരം നല്‍കിയത്. ഇതിന്റെ അടിസ്ഥാനത്തില്‍ സീറ്റ് ബെല്‍റ്റും ഹെല്‍മറ്റും ധരിക്കാത്തതിനുള്ള പിഴ പകുതിയാക്കി കുറച്ചു.
മദ്യപിച്ച് വാഹനമോടിച്ചാലുള്ള പിഴയില്‍ കുറവുവരുത്തിയിട്ടില്ല.