മുല്ലശ്ശേരി: കേസില്‍ പ്രതിയായ ആര്‍ എസ് എസ് കാരനായ മകനെ അറസ്റ്റ് ചെയ്യാന്‍ വീട്ടിലെത്തിയ പാവറട്ടി എസ് ഐ അനില്‍ ടി മേപ്പിളളിയെയും പൊലിസുകാരെയും പ്രതിയും പിതാവും ചേര്‍ന്ന് ആക്രമിച്ചു .കൂടെയുണ്ടായിരുന്ന സി പി ഒ മാരായ ഷിജു കുരിയന്‍, സിദ്ദീക്ക് എ എന്നിവരെ കൈയേറ്റം ചെയ്യുകയും ചെയ്തു. കഴുത്തിന് പരുക്കേറ്റ എസ് ഐയെ മുല്ലശ്ശേരി ബ്ലോക്ക് ആശുപത്രിയില്‍ പ്രവേശിപ്പിച്ചു. ആക്രമണവുമായി ബന്ധപ്പെട്ട് ആര്‍ എസ് എസ് പ്രവര്‍ത്തകനും നിരവധി കേസുകളില്‍ പ്രതിയുമായ പാവറട്ടി പുതുമനശ്ശേരി സ്വദേശി പുല്ലാട്ട് വീട്ടില്‍ ശ്രീജിത്ത് 25 നെ പൊലിസ് അറസ്റ്റ് ചെയ്തു.
ഇയാളുടെ പിതാവും മറ്റൊരും പ്രതിയുമായ ചന്ദ്രന്‍ ഓടി രക്ഷപെട്ടു. ബുധനാഴ്ചയാണ് സംഭവം.കഴിഞ്ഞ ദിവസം ശ്രീജിത്തും, സഹോദരനും ചേര്‍ന്ന് ഡിവൈഎഫ്‌ഐ പ്രവര്‍ത്തകനും പാവറട്ടി സ്വദേശിയുമായ മാളിയേക്കല്‍ അലോഷ്യസിന്റെ മകന്‍ ആല്‍വിനെ വീട്ടില്‍ കയറി ഭീഷണി പെടുത്തുകയും മനപ്പടിയില്‍ വച്ച് ആക്രമിച്ച് പരിക്കേല്‍പ്പിക്കുകയും ചെയ്തിരുന്നു. ഈ കേസില്‍ പ്രതിയായ ഇരുവരെയുമന്വേഷിച്ച് എത്തിയതായിരുന്നു പൊലിസ്, വീട്ടിലേക്കുള്ള വഴിയില്‍ വെച്ച് ശ്രീജിത്തിനോട് കാര്യങ്ങള്‍ പറയുകയും നിങ്ങള്‍ രണ്ട് പേരും സ്റ്റേഷനിലേക്ക് വരണമെന്നും പൊലിസ് ആവശ്യപെടുകയും ചെയ്തു.
എന്നാല്‍ യാതൊരു പ്രകോപനവുമില്ലാതെ സഹോദരന്‍ വീട്ടില്‍ ഇല്ലെന്ന് പറഞ്ഞ പ്രതി എസ് ഐയെ കഴുത്തില്‍ പിടിച്ച് തള്ളി താഴെയിട്ട് ആക്രമിക്കുകയായിരുന്നുവെന്ന് പൊലിസ് പറഞ്ഞു.എസ് ഐയെ ആക്രമിക്കുന്നത് കണ്ട പൊലിസുകാര്‍ ഓടിയെത്തി പ്രതിയെ കീഴ്‌പെടുത്താന്‍ ശ്രമിക്കുന്നതിനിടയില്‍ പ്രതിയുടെ ചന്ദ്രനും ചേര്‍ന്ന് പൊലിസിനെ ആക്രമിക്കുകയായിരുന്നു. ബലം പ്രയോഗിച്ച് ശ്രീജിത്തിനെ പൊലിസ് കീഴ്‌പെടുത്തുന്നതിനിടയില്‍ ചന്ദ്രന്‍ ഓടി രക്ഷപെട്ടു. ഔദ്യോഗിക കൃത്യനിര്‍വഹണം തടസപെടുത്തിയതിനും പൊലിസ് ഓഫിസര്‍മാരെ ആക്രമിച്ചതിനും ഇരുവര്‍ക്കുമെതിരേ പൊലിസ് കേസെടുത്തു.