ന്യൂഡല്‍ഹി: സ്‌പോര്‍ട്‌സ് കൗണ്‍സില്‍ പ്രസിഡന്റ് സ്ഥാനത്തുനിന്ന് ഒളിമ്പ്യന്‍ അഞ്ജു ബോബി ജോര്‍ജ്ജിനെ നീക്കാനുള്ള സര്‍ക്കാര്‍ നടപടിയെ വിമര്‍ശിച്ച് കെ.പി.സി.സി പ്രസിഡന്റ് വി.എം സുധീരന്‍. അഞ്ജുവിനെ അപമാനിച്ച് പുറത്താക്കാനുള്ള ശ്രമം ശരിയല്ലെന്ന് അദ്ദേഹം പറഞ്ഞു.

മറ്റു കോര്‍പ്പറേഷനുകളെപ്പോലെയുള്ള നിയമനമായി ഇതിനെ കാണാന്‍ പാടില്ലായിരുന്നു. പുതിയ സര്‍ക്കാരിന് അവരെ മാറ്റാനുള്ള അധികാരമുണ്ട്. രാഷ്ട്രീയമായല്ല അഞ്ജുവിന്റെ നിയമനമുണ്ടായത്. മാറ്റണമെന്ന് നിര്‍ബന്ധമുണ്ടെങ്കില്‍ അവരെ അപമാനിച്ച് അവഹേളിച്ച് പുറത്തുചാടിക്കാനുള്ള ശ്രമം ഒട്ടും പാടില്ലായിരുന്നു.

കലാ- സാംസ്‌കാരിക മേഖകളെ കേന്ദ്രത്തില്‍ ബി.ജെ.പി സര്‍ക്കാര്‍ ചെയ്യുന്നതുപോലെ രാഷ്ട്രീയവല്‍ക്കരിക്കാനുള്ള ശ്രമം ഇവിടെയും ഉണ്ടാവാന്‍ പാടില്ല. സംഭവത്തില്‍ മിനിമം മര്യാദ പാലിക്കേണ്ട ബാധ്യത സര്‍ക്കാരിനുണ്ടെന്നും സുധീരന്‍ പറഞ്ഞു.