കോഴിക്കോട്: അതിജീവനത്തിന്റെ വഴികളില്‍ കരുത്തുപകരാന്‍ മലയോര മേഖലയില്‍ മഹോത്സവം 2019ന് ഇന്നു തുടക്കമാകും. മുക്കം അഗസ്ത്യന്‍മൂഴി ജില്ലാ പഞ്ചായത്ത് സ്റ്റേഡിയത്തില്‍ നടക്കുന്ന മേള വൈകിട്ട് 4.30ന് മന്ത്രി എ.കെ ശശീന്ദ്രന്‍ ഉദ്ഘാടനം ചെയ്യും. ജോര്‍ജ് എം. തോമസ് എം.എല്‍.എ അധ്യക്ഷനാകും. എം.കെ രാഘവന്‍ എം.പി മുഖ്യാതിഥിയാകും. ഉദ്ഘാടന സമ്മേളത്തിന് മുന്നോടിയായുള്ള സാംസ്‌കാരിക ഘോഷയാത്ര വൈകിട്ട് മൂന്നിന് മുക്കം പുതിയ ബസ് സ്റ്റാന്‍ഡ് പരിസരത്തു നിന്നാരംഭിക്കും.
നിപ, പ്രളയം എന്നിവയെ തുടര്‍ന്ന് ഭൗതികമായും സാമ്പത്തികമായും തകര്‍ന്ന നാടിന്റെ പുനരുജ്ജീവനത്തിനായി 'അതിജീവനത്തിനൊരു കൈത്താങ്ങ്' എന്ന പ്രമേയത്തിലാണു മലയോര മഹോത്സവത്തിന് അരങ്ങാരുക്കുന്നത്. മലയോരത്തെ വിവിധ പ്രദേശങ്ങളിലെ കാര്‍ഷിക ഉല്‍പന്നങ്ങളുടെയും ചെറുകിട-കുടില്‍ വ്യവസായ ഉല്‍പന്നങ്ങളുടെയും വിപണനം, സംസ്ഥാനത്തിന്റെ ദുരിതാശ്വാസ പ്രവര്‍ത്തനങ്ങളെ സഹായിക്കുക തുടങ്ങിയവയാണ് പ്രധാനമായും മേള ലക്ഷ്യമിടുന്നത്.
സര്‍ക്കാര്‍ ആയിരം ദിനം പൂര്‍ത്തീകരിക്കുമ്പോള്‍ കൈവരിച്ച വികസനക്ഷേമ പ്രവര്‍ത്തനങ്ങളുടെ ചിത്രപ്രദര്‍ശനവും പ്രസിദ്ധീകരണങ്ങളുടെ വിതരണവും വില്‍പനയും മേളയില്‍ സംഘടിപ്പിക്കുന്നുണ്ട്. എന്‍.ഐ.ടി, മെഡിക്കല്‍ കോളജ്, ഫയര്‍ഫോഴ്‌സ്, വെറ്ററിനറി സര്‍വകലാശാല, ബി.എസ്.എന്‍.എല്‍, എക്‌സൈസ് വകുപ്പ്, ഫെഡറല്‍ ബാങ്ക്, എം.വി.ആര്‍ കാന്‍സര്‍ സെന്റര്‍, കേരള ഫീഡ്‌സ്, സോയല്‍ കണ്‍സര്‍വേഷന്‍ വകുപ്പ്, അരീക്കനട്ട് ആന്‍ഡ് സ്‌പൈസസ് റിസേര്‍ച് സെന്റര്‍ തുടങ്ങിയ കേന്ദ്രസംസ്ഥാന സര്‍ക്കാര്‍ വകുപ്പുകളുടെ സ്റ്റാളുകളും കുടുംബശ്രീയുടെ 25 ലധികം സ്റ്റാളുകളും മറ്റ് ഉല്‍പന്നങ്ങളുടെ 80ലധികം സ്റ്റാളുകളും പ്രദര്‍ശനത്തിലുണ്ടാകും.
ഇന്നുമുതല്‍ 13 വരെ മൃഗസംരക്ഷണ വകുപ്പിന്റെ പൂച്ച പ്രദര്‍ശനം, 17ന് കന്നുകാലി പ്രദര്‍ശനവും മത്സരവും, 18ന് ആട് പ്രദര്‍ശനം, 19ന് കന്നുകുട്ടി പ്രദര്‍ശനവും മത്സരവും, 20ന് അലങ്കാര പക്ഷി പ്രദര്‍ശനം, 22ന് ശ്വാനപ്രദര്‍ശനവും മത്സരവും എന്നിവ നടക്കും. വിനോദത്തിനും സാഹസികതയ്ക്കുമുളള സംവിധാനങ്ങളും പ്രദര്‍ശന നഗരിയിലൊരുക്കിയിട്ടുണ്ട്. കുടുംബശ്രീ ജില്ലാ മിഷന്റെ നേതൃത്വത്തില്‍ 3000 ച.അടി വിസ്തൃതിയിലൊരുക്കുന്ന ഫുഡ്‌കോര്‍ട്ടാണ് മേളയുടെ മറ്റൊരു ആകര്‍ഷണം.
ജില്ലാ പഞ്ചായത്തിന്റെയും തിരുവമ്പാടി പഞ്ചായത്തിന്റെയും നേതൃത്വത്തില്‍ കുന്ദമംഗലം-കൊടുവള്ളി ബ്ലോക്ക് പഞ്ചായത്തുകള്‍, പുതുപ്പാടി, കാരശേരി, കട്ടിപ്പാറ, താമരശ്ശേരി, കുന്ദമംഗലം, ചാത്തമംഗലം, പെരുവയല്‍, പെരുമണ്ണ, കുരുവട്ടൂര്‍, മാവൂര്‍, മടവൂര്‍ പഞ്ചായത്തുകള്‍, മുക്കം, കൊടുവള്ളി നഗരസഭകള്‍ എന്നിവയുടെ സഹകരണത്തോടെയാണു മേള സംഘടിപ്പിക്കുന്നത്. മേള 27ന് സമാപിക്കും.