തിരുവനന്തപുരം: പ്രഥമ ദേശീയ യോഗ ഫെഡറേഷന്‍ കപ്പ് മത്സരം തിരുവനന്തപുരത്ത് നടക്കുമെന്ന് സംഘാടക സമിതി ചെയര്‍മാന്‍ എം വിജയകുമാര്‍ വാര്‍ത്താസമ്മേളനത്തില്‍ പറഞ്ഞു. മാര്‍ച്ച് 24 മുതല്‍ 26 വരെ ജിമ്മി ജോര്‍ജ്ജ് ഇന്‍ഡോര്‍ സ്‌റ്റേഡിയത്തിലാണ് മത്സരം.
22 സംസ്ഥാനങ്ങളില്‍ നിന്നുമായി 350 കായിക താരങ്ങള്‍ വിവിധ മത്സരത്തില്‍ മാറ്റുരക്കും. ജാര്‍ഖണ്ഡില്‍ നടന്ന ദേശീയ യോഗ ചാമ്പ്യന്‍ഷിപ്പില്‍ ആദ്യ പത്ത് സ്ഥാനങ്ങള്‍ നേടിയവരും സംസ്ഥാന യോഗ മത്സര വിജയികളുമാകും ഈ താരങ്ങള്‍. എട്ട് മുതല്‍ 11 വയസ് വരെ പ്രായപരിധിയിലുള്ള സബ്ജൂനിയര്‍ ഗ്രൂപ്പ്, 11-17 പ്രായപരിധിയിലെ ജൂനിയര്‍ ഗ്രൂപ്പ്, 17-25 പരിധിയിലെ സീനിയര്‍ ഗ്രൂപ്പ് എ, 25 വയസിന് മുകളിലുള്ള സീനിയര്‍ ഗ്രൂപ്പ് ബി വിഭാഗങ്ങളിലാണ് മത്സരം. സിംഗപ്പൂരില്‍ നടക്കുന്ന യോഗ ലോക ചാമ്പ്യന്‍ഷിപ്പിലേക്കുള്ള തിരഞ്ഞെടുപ്പും ടൂര്‍ണമെന്റില്‍ നടക്കും.