ബെയ്ജിങ്: ചരിത്രം കുറിച്ച ചൈനയുടെ ചാന്ദ്രദൗത്യം ചാങ് ഇ-4 ചന്ദ്രനില്‍നിന്നു ചിത്രങ്ങള്‍ പകര്‍ത്തിയയച്ചു. ചാങ്-4 പേടകത്തിലെ രണ്ട് വാഹനങ്ങളാണ് പരസ്പരം ചിത്രങ്ങളെടുത്ത് ഭൂമിയിലേക്ക് അയച്ചിരിക്കുന്നത്. ചന്ദ്രോപരിതലത്തിന്റെ ചിത്രങ്ങളും പകര്‍ത്തിയിട്ടുണ്ട്. വാഹനങ്ങള്‍ ചന്ദ്രോപരിതലത്തില്‍ ഇറങ്ങുന്നതിന്റെ വിഡിയോ ദൃശ്യങ്ങളും ഭൂമിയിലേക്ക് അയച്ചിട്ടുണ്ട്.

ഈ മാസം മൂന്നിനാണ് ചാന്ദ്രപര്യവേക്ഷണത്തില്‍ പുതിയ ചരിത്രം കുറിച്ച് ചൈന വിക്ഷേപിച്ച ചാങ് ഇ4(ഇവമിഴ'ല 4 ) ചന്ദ്രന്റെ ഇരുണ്ട ഭാഗത്ത് ഇറങ്ങിയത്. ഇതാദ്യമായാണ് ഒരു രാജ്യം ചന്ദ്രന്റെ ഇരുണ്ടഭാഗം എന്ന് അറിയപ്പെടുന്ന പ്രദേശത്ത് പേടകമിറക്കുന്നത്. ഭൂമിയില്‍നിന്നു കാണുന്ന ചന്ദ്രന്റെ മറുവശമാണ് ഇരുണ്ടഭാഗം എന്ന പേരില്‍ അറിയപ്പെടുന്നത്. ഭൂമിയുടെയും ചന്ദ്രന്റെയും ഭ്രമണ സമയത്തിലുള്ള വ്യത്യാസം കാരണം ഒരിക്കലും ഭൂമിക്ക് അഭിമുഖമായി വരാത്ത ഭാഗമാണിത്.

കഴിഞ്ഞ ഡിസംബര്‍ എട്ടിനാണ് ചൈനയിലെ സിച്വാനില്‍ ഷിചാങ് ഉപഗ്രഹ വിക്ഷേപണകേന്ദ്രത്തില്‍ നിന്ന് ചാങ്4 ബഹിരാകാശത്തേക്കു പറന്നുയര്‍ന്നത്. നാലുദിവസത്തിനകം ദൗത്യം ഭ്രമണപഥത്തിലെത്തുകയും ചെയ്തു. ഗുരുത്വാകര്‍ഷണം കുറഞ്ഞ അന്തരീക്ഷത്തിലെ സസ്യങ്ങളുടെ വളര്‍ച്ച, ഈ പ്രദേശങ്ങളിലെ ജലത്തിന്റെയും മനുഷ്യ ജീവന് ആവശ്യമായ മറ്റു വിഭവങ്ങളുടെയും ലഭ്യത തുടങ്ങിയവ കണ്ടെത്തുകയാണു പേടകത്തിന്റെ ദൗത്യം. അടുത്ത വര്‍ഷം കൂടുതല്‍ ദൗത്യങ്ങളുമായി ചാങ്5 പേടകവും വിക്ഷേപിക്കാന്‍ ചൈന പദ്ധതിയിടുന്നുണ്ട്.