ജിദ്ദ: കൊറോണ വൈറസ് വ്യാപനം വഴി ആഗോള എണ്ണ വിപണിയില്‍ ഉണ്ടായേക്കാവുന്ന പ്രത്യാഘാതങ്ങള്‍ സസൂഷ്മം നരീക്ഷിച്ചു വരികയാണെന്ന് സഊദി ഊര്‍ജ മന്ത്രി. കൊറോണ വൈറസ് ബാധ ചൈനയെയും ആഗോള സമ്പദ് വ്യവസ്ഥയെയും പ്രതികൂലമായി ബാധിക്കുമെന്നും മന്ത്രി പറഞ്ഞു.

എണ്ണ വിപണി ഉള്‍പ്പെടെ ആഗോള വിപണിയെ കൊറോണ വൈറസ് വ്യാപനം പ്രതികൂലമായി ബാധിക്കുമെന്ന് അബ്ദുല്‍ അസീസ് ബിന്‍ സല്‍മാന്‍ രാജകുമാരന്‍ പറഞ്ഞു. എന്നാല്‍ ആഗോള എണ്ണയാവശ്യത്തില്‍ കോറോണ വ്യാപനത്തിന്റെ സ്വാധീനം പരിമിതമായിരിക്കുമെന്നും അദ്ദേഹം കൂട്ടി ചേര്‍ത്തു. കോറോണ വ്യാപനം നിയന്ത്രണ വിധേയമാക്കുന്നതിനും വൈറസിനെ പാടെ ഇല്ലാതാക്കുന്നതിനും ചൈനീസ് സര്‍ക്കാരിനും ആഗോള സമൂഹത്തിനും സാധിക്കുമെന്നും മന്ത്രി ശുഭാപ്തി വിശ്വാസം പ്രകടിപ്പിച്ചു

എണ്ണ വിപണി അടക്കം ആഗോള വിപണിയെ കൊറോണ വ്യാപനം പ്രതികൂലമായി ബാധിക്കുമെന്നാണ് കരുതുന്നത്. എന്നാൽ ആഗോള തലത്തിൽ എണ്ണയാവശ്യത്തിൽ കൊറോണ വ്യാപനത്തിന്റെ സ്വാധീനം പരിമിതമായിരിക്കും. 2003 ൽ സാർസ് വൈറസ് വ്യാപനം മൂലമുണ്ടായ പ്രതിസന്ധിക്കിടെയും ഇത്തരം അശുഭാപ്തി വിശ്വാസം ചിലർ വെച്ചുപുലർത്തിയിരുന്നു. എന്നാൽ അന്ന് പെട്രോൾ ആവശ്യത്തിൽ എടുത്തുപറയത്തക്ക കുറവുണ്ടായില്ല. വിപണിയിലുണ്ടാകുന്ന ഏതു മാറ്റങ്ങളുമായും പ്രതികരിക്കുന്നതിനുള്ള ശേഷി ഒപെക് രാജ്യങ്ങൾക്കുണ്ട്. ആവശ്യമെങ്കിൽ എണ്ണ വിപണിയുടെ സ്ഥിരതക്ക് അനിവാര്യമായ നടപടികൾ ഒപെക് സ്വീകരിക്കുമെന്നും സഊദി ഊർജ മന്ത്രി പറഞ്ഞു.

ചൈനയിലുള്ള 800 സഊദികളുടെ സുരക്ഷ ഉറപ്പു വരുത്തുന്നതിന് ആവശ്യമായ എല്ലാ നടപടികളും സത്വരം സ്വീകരിക്കുന്നതിന് തിരുഗേഹങ്ങളുടെ സേവകൻ സൽമാൻ രാജാവും കിരീടാവകാശി മുഹമ്മദ് ബിൻ സൽമാൻ രാജകുമാരനും ചൈനയിലെ സഊദി എംബസിക്ക് നിർദേശം നൽകിയിട്ടുണ്ടെന്ന് അംബാസഡർ തുർക്കി അൽമാദി പറഞ്ഞു. ചൈനയിലുള്ള സഊദി വിദ്യാർഥികൾക്കും സന്ദർശകർക്കും എല്ലാവിധ സഹായങ്ങളും എംബസി നൽകുന്നുണ്ട്. രോഗം പടർന്നുപിടിച്ച മേഖലകളിൽ നിന്ന് സഊദി പൗരന്മാരെ ഒഴിപ്പിക്കുകയും സ്വദേശത്തേക്ക് മടങ്ങാൻ ആഗ്രഹിക്കുന്നവർക്ക് അതിനു വേണ്ട സഹായങ്ങൾ ചെയ്തുകൊടുക്കുന്നുണ്ടെന്നും അദ്ദേഹം അറിയിച്ചു.