മട്ടാഞ്ചേരി: മഴക്കാല ടൂറിസത്തെ വരവേല്‍ക്കുന്നതിനായി പ്രമുഖ വിനോദ സഞ്ചാര മേഖലയായ ഫോര്‍ട്ട്‌കൊച്ചി ഒരുങ്ങി. മണ്‍സൂണ്‍ ടൂറിസം ഫോര്‍ട്ട്‌കൊച്ചിയെ സംബന്ധിച്ചിടത്തോളം പ്രധാനപ്പെട്ടതാണ്. മണ്‍സൂണ്‍ ടൂറിസത്തെ ലക്ഷ്യംവച്ച് നിരവധി സഞ്ചാരികളാണ് ഫോര്‍ട്ട്‌കൊച്ചിയിലെത്തുന്നത്. ഫോര്‍ട്ട്‌കൊച്ചിയില്‍ മണ്‍സൂണ്‍ ടൂറിസത്തിനായി സഞ്ചാരികള്‍ എത്തി തുടങ്ങിയിട്ടുണ്ട്. ടൂറിസം പ്രൊഫഷണല്‍ ക്ലബ്ബിന്റെ നേതൃത്വത്തില്‍ സഞ്ചാരികളെ വരവേല്‍ക്കുന്നതിനായി വിവിധ പരിപാടികളും ആസൂത്രണം ചെയ്തിട്ടുണ്ട്. മഴക്കാല ഫുട്‌ബോള്‍ ഇതില്‍ പ്രധാനപ്പെട്ടതാണ്.ഇതിനായുള്ള ഒരുക്കങ്ങളും കൊച്ചി കേന്ദ്രീകരിച്ച് നടന്ന് വരുന്നു.
സാധാരണ മഴക്കാലത്ത് കാര്യമായ സഞ്ചാരികള്‍ എത്താറുണ്ടായിരുന്നില്ല. എന്നാല്‍ മഴക്കാല ടൂറിസത്തിന്റെ സാദ്ധ്യത പ്രയോജനപ്പെടുത്താന്‍ ടൂറിസം മേഖല തയ്യാറായതോടെയാണ് മണ്‍സൂണ്‍ ടൂറിസത്തിന് പ്രാധാന്യം വന്നത്. ചാര്‍ട്ടേഡ് ഫ്‌ളൈറ്റിലാണ് സാധാരണ മണ്‍സൂണ്‍ ടൂറിസം വേളയില്‍ സഞ്ചാരികള്‍ എത്താറുള്ളത്. വിവിധ ഹോട്ടലുകളും ഹോംസറ്റേകളും മുന്‍കൂട്ടി ബുക്ക് ചെയ്തായിരിക്കും ഇവര്‍ എത്തിച്ചേരുക. ഈ വര്‍ഷവും മണ്‍സൂണ്‍ ടൂറിസം വേളയില്‍ കാര്യമായ സഞ്ചാരികള്‍ എത്തിച്ചേരുമെന്ന പ്രതീക്ഷയിലാണ് ടൂറിസം മേഖല.