പാപ്പിനിശ്ശേരി: സ്‌കൂളുകളില്‍ ജൂണില്‍ വിതരണം ചെയ്ത സൗജന്യ യൂനിഫോമിന്റെ ഫണ്ട് ഇനിയും സര്‍ക്കാര്‍ പൂര്‍ണമായി നല്‍കിയില്ല.
പുതിയ വിദ്യാലയ വര്‍ഷം തുടങ്ങുന്നതിന് മുന്‍പ് മെയ് മാസമാണ് ആദ്യ ഗഡു എന്ന നിലയില്‍ തുക ബന്ധപ്പെട്ട പ്രധാനാധ്യാപകരുടെ അക്കൗണ്ടിലേക്ക് വിദ്യാഭ്യാസ വകുപ്പ് നല്‍കിയത്. എന്നാല്‍ എല്ലാ വിദ്യാലയങ്ങളും ജൂണില്‍ തന്നെ എല്ലാ കുട്ടികള്‍ക്കും സൗജന്യ യൂനിഫോം തുണി വിതരണം ചെയ്തിരുന്നു. ഫണ്ട് ജൂണ്‍ മാസമോ ജൂലൈ മാസമോ നല്‍കുമെന്ന് വാഗ്ദാനം ചെയ്തതെല്ലാതെ വിദ്യാലയ വര്‍ഷം അവസാനിക്കാറായിട്ടും ഫണ്ട് ഇനിയും നല്‍കിയിട്ടില്ല.
യൂനിഫോം തുണി നല്‍കിയ കടകളില്‍ ഭീമമായ കുടിശ്ശിക വന്നതോടെ പല പ്രധാനാധ്യാപകരും സ്വന്തം കീശയില്‍ നിന്ന് ബന്ധപ്പെട്ടവര്‍ക്ക് പണം നല്‍കിയാണ് തടിയൂരിയത്. ഇതു മൂലം അരലക്ഷം രൂപ വരെ ബാധ്യത വന്ന വിദ്യാലയങ്ങളുമുണ്ട്. എന്നാല്‍ സര്‍ക്കാര്‍ സ്‌കൂളുകളില്‍ എസ്.എസ്.എ മുഖേനയാണ് യുനിഫോം വിതരണം ചെയ്തത്.
അതേസമയം നിലവിലുള്ള അധ്യയന വര്‍ഷത്തെ ഫണ്ട് പൂര്‍ണമായി നല്‍കാതെ തന്നെ 2019-20 വര്‍ഷം വിതരണം ചെയ്യുമെന്ന് പറയുന്ന കൈത്തറി യൂനിഫോമിന്റെ കളര്‍ നല്‍കാനുള്ള നീദേശവും പ്രധാനധ്യാപകര്‍ക്ക് നല്‍കിയിട്ടുണ്ട്. എന്നാല്‍ പ്രധാനാധ്യാപകര്‍ ഈ വര്‍ഷം യൂനിഫോമിന് ചെലവഴിച്ചതിന്റെ കുടിശ്ശിക വിതരണത്തിന്റെ കാര്യത്തില്‍ വിദ്യാഭ്യാസ വകുപ്പ് അധികൃതര്‍ വ്യക്തമായി മറുപടി നല്‍കുന്നില്ലെന്നാണ് പ്രധാനധ്യാപകരുടെ ആക്ഷേപം.