പത്തനംതിട്ട: ശബരിമലയില്‍ ഒട്ടേറെ ആചാര ലംഘനങ്ങള്‍ ഉണ്ടായിട്ടുണ്ടെന്ന് ദേവസ്വം പ്രസിഡന്റ് എ. പത്മകുമാര്‍ വാര്‍ത്താസമ്മേളനത്തില്‍ പറഞ്ഞു. ആചാരം ഏത്, ആചാരവിരുദ്ധം ഏത് എന്നീ കാര്യങ്ങളില്‍ വിശദമായ ചര്‍ച്ചകള്‍ നടക്കണം.
അരയ സമുദായം നടത്തിയെന്ന് പറയപ്പെടുന്ന തേനഭിഷേകം നിര്‍ത്തലാക്കിയത്, അയ്യപ്പന്മാര്‍ മല ചവിട്ടുന്നതിനു മുന്‍പ് മുങ്ങിക്കുളിച്ചിരുന്ന ഭസ്മക്കുളം മൂടിയത്, പതിനെട്ടാംപടി പഞ്ചലോഹം പൊതിഞ്ഞത്, കാന ക്ഷേത്രമായ ശബരിമലയില്‍ കെട്ടിടങ്ങള്‍ നിര്‍മിച്ചത് തുടങ്ങിയവ ആചാരലംഘനങ്ങളാണ്. യുവതികളെ പ്രവേശിപ്പിക്കണമെന്ന് ബോര്‍ഡ് എവിടെയും പറഞ്ഞിട്ടില്ല. ആചാരാനുഷ്ഠാനങ്ങള്‍ക്ക് ഒപ്പമാണ് ബോര്‍ഡ്. ബോര്‍ഡിന്റെ നിലപാടില്‍ മാറ്റമില്ല. യുവതീപ്രവേശത്തില്‍ കോടതി വിധി വരട്ടെയെന്നും പ്രസിഡന്റ് അഭിപ്രായപ്പെട്ടു.
കുപ്രചാരണങ്ങളുടെ ഭാഗമായി വരുമാനത്തില്‍ കുറവുവന്നാലും അതെല്ലാം പരിഹരിക്കാന്‍ സര്‍ക്കാര്‍ കൂടെയുണ്ടെന്ന ഉത്തമവിശ്വാസം ബോര്‍ഡിനുണ്ട്. എത്ര തുക കുറവുണ്ടായാലും ദേവസ്വം ബോര്‍ഡ് ജീവനക്കാര്‍ക്കും അതുമായി ബന്ധപ്പെട്ട് പ്രവര്‍ത്തിക്കുന്നവര്‍ക്കും ഒരുകുഴപ്പവും വരാതെ ബോര്‍ഡ് നോക്കും. ശബരിമലയെ കോണ്‍ക്രീറ്റ് കാടാക്കാന്‍ ആഗ്രഹിക്കുന്നില്ല. ശബരിമലക്ഷേത്രം കാന ക്ഷേത്രമായി തന്നെ തുടരണമെന്നാണ് ബോര്‍ഡിന്റെ ആഗ്രഹം. പമ്പ- നിലയ്ക്കല്‍ റൂട്ടില്‍ തീര്‍ഥാടകര്‍ക്ക് സൗജന്യ സര്‍വിസ് ഒരുക്കാനുള്ള ശ്രമം നടത്തും. തിരുപ്പതി മോഡല്‍ സര്‍വിസിനാണ് ശ്രമം. ഗതാഗത സെക്രട്ടറി അടക്കമുള്ളവരുടെ പരിഗണനയിലേക്ക് ഈ നിര്‍ദേശം വിടുകയാണ്.
സന്നദ്ധ സംഘടനകള്‍, വ്യക്തികള്‍ എന്നിവര്‍ ബസുകള്‍ നല്‍കാമെന്ന് അറിയിച്ചിട്ടുണ്ട്. കെ.എസ്.ആര്‍.ടി.സിയുടെ നഷ്ടത്തെക്കുറിച്ചല്ല, ഭക്തരുടെ ലാഭത്തെക്കുറിച്ചാണ് ബോര്‍ഡ് ചിന്തിക്കുന്നത്. ഇത്തരം ക്രമീകരണങ്ങള്‍ വിഷുവിന് നടപ്പാക്കും. തന്നെ കോണ്‍ഗ്രസിലേക്ക് ക്ഷണിച്ച കെ. മുരളീധരന്‍ കോണ്‍ഗ്രസില്‍ അദ്ദേഹത്തിന്റെ സ്ഥാനം ഉറപ്പാക്കണം. രാമന്‍ നായരെ പോലും നേരെചൊവ്വേ നോക്കാന്‍ സാധിക്കാത്ത പാര്‍ട്ടിയാണത്. മുന്നണിയും പാര്‍ട്ടിയും മാറി മാറിപ്പോകുന്നവര്‍ക്ക് തന്റെ നിലപാട് മനസിലാകില്ലെന്നും പത്മകുമാര്‍ പറഞ്ഞു. വാര്‍ത്താസമ്മേളനത്തില്‍ ബോര്‍ഡ് അംഗങ്ങളായ കെ.പി ശങ്കരദാസ്, അഡ്വ.എന്‍. വിജയകുമാര്‍, ദേവസ്വം കമ്മിഷണര്‍ എന്‍.വാസു, ചീഫ് എന്‍ജിനിയര്‍ ശങ്കരന്‍പോറ്റി എന്നിവരും പങ്കെടുത്തു.