മണ്ണാര്‍ക്കാട്: ചരിത്രത്തെ വികലമാക്കിയും രാജ്യത്ത് വിഭജനവും വിഭാഗീയതയും വളര്‍ത്തി ഭാരതത്തെ തകര്‍ക്കാനുള്ള ഫാഷിസ്റ്റു ഭരണകൂടത്തിന്റെ കുടില തന്ത്രങ്ങളെ തിരിച്ചറിയണമെന്ന് പ്രശസ്ത കോളമിസ്റ്റ് രാം പുനിയാനി ആവശ്യപെട്ടു.
ഗാന്ധിയന്‍ തത്ത്വങ്ങളെ കുഴിച്ച് മൂടുകയും ഗോള്‍ വാള്‍ക്കറുടെ സംസ്‌കാരം ഭാരതീയ പൈതൃകത്തിന്റെ ഭാഗമാക്കാനുമാണ് ഭരണകൂടം ശ്രമിച്ചു കൊണ്ടിരിക്കുന്നത്.
കേരള അറബിക് ടീച്ചേഴ്‌സ് ഫെഡറേഷന്‍ സംസ്ഥാന സമ്മേളനത്തോടനുബന്ധിച്ചു നടന്ന വിദ്യാഭ്യാസ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അഡ്വ.എന്‍ ശംസുദ്ധീന്‍ എം.എല്‍.എ അധ്യക്ഷനായി. എം. സലാഹുദ്ധീന്‍ മദനി കെ.എസ്.ടി.എ ജനറല്‍ സെക്രട്ടറി ഹരികൃഷ്ണന്‍, എം.ടി സൈനുല്‍ ആബിദീന്‍, ഇ.എ.റഷീദ്, എസ്.എ റസാഖ് പ്രസംഗിച്ചു.
കേരള അറബിക് ടീച്ചേഴ്‌സ് ഫെഡറേഷന്‍ 62 ാമത് സംസ്ഥാന സമ്മേളനം മണ്ണാര്‍ക്കാട്ട് പ്രൗഢമായ ചടങ്ങുകളോടെ സമാപിച്ചു. ഭാഷാ വൈവിധ്യം രാഷ്ട്രത്തിന്റെ സൗന്ദര്യം എന്ന പ്രമേയത്തില്‍ നടത്തിയ സമ്മേളനത്തില്‍ കേരളത്തിലെ സാമൂഹിക സാംസ്‌കാരിക രാഷ്ട്രീയ മണ്ഡലങ്ങളിലെ പ്രമുഖര്‍ പങ്കെടുത്തു.
വിവിധ സെഷനുകളിലായി പാണക്കാട് സയ്യിദ് ഹൈദരലി ശിഹാബ് തങ്ങള്‍, പ്രതിപക്ഷ ഉപനേതാവ് ഡോ: എം.കെ. മുനീര്‍, എം.എല്‍.എ. മാരായ അബ്ദുല്‍ ഹമീദ്, അഡ്വ: എന്‍. ഷംസുദ്ദീന്‍, മുന്‍മന്ത്രി നാലകത്ത് സൂപ്പി, മുന്‍ എം.എല്‍.എ കളത്തില്‍ അബ്ദുള്ള പങ്കെടുത്തു.
പൗരന് തുല്യാവകാശം നല്‍കുന്ന ഇന്ത്യന്‍ ഭരണഘടനയുടെ അടിസ്ഥാന തത്ത്വങ്ങള്‍ക്ക് വിരുദ്ധമായ നിയമങ്ങള്‍ അടിച്ചേല്‍പിക്കുന്ന നടപടിയില്‍ നിന്നും കേന്ദ്രസര്‍ക്കാര്‍ പിന്‍മാറണമെന്ന് സമ്മേളനം ആവശ്യപെട്ടു.
പതിനായിരക്കണക്കിന് അധ്യാപകരെ അണിനിരത്തിയ ഭരണഘടന സംരക്ഷണ ശക്തി പ്രകടനം അധികാരികള്‍ക്ക് താക്കീതായി.
ഇബ്രാഹിം മുതൂര്‍, എം.വി. അലിക്കുട്ടി, എം.പി. അബ്ദുല്‍ ഖാദര്‍, ടി.പി. അബ്ദുല്‍ ഹഖ്, എച്ച്.സലിം, ഷാഹുല്‍ ഹമീദ് മേല്‍മുറി, ഇ. അബ്ദുല്‍ റഷീദ്, പി.പി. അബ്ദുല്‍ ലത്തീഫ് ,എം.എ ലത്തീഫ് , മാഹിന്‍ ബാഖവി, എം.ടി. സൈനുല്‍ ആബിദീന്‍, പി. കുഞ്ഞലവി, കെ നൂറുല്‍ അമീന്‍, എം.ടി എ.നാസര്‍, വി.എ.എം യുസുഫ് പ്രകടനത്തിന് നേതൃത്വം നല്‍കി.