മട്ടാഞ്ചേരി: ദേവീപ്രീതിയുടെ പ്രാര്‍ഥനാ സാഫല്യ ആരാധനയുമായി അമരാവതിദേശത്ത്  അന്നക്കളിയാഘോഷം. ആല്‍ത്തറ ഭഗവതി ക്ഷേത്ര താലപ്പൊലിയോടനുബന്ധിച്ചാണ് അന്നക്കളി അരങ്ങേറുന്നത്. പോര്‍ച്ചുഗീസ്  മതപീഡനത്തെ തുടര്‍ന്ന് ഗോവയില്‍ നിന്ന് പാലയനം ചെയ്ത കൊച്ചിയിലെത്തിയ വൈശ്യ സമാജരുടെ  ക്ഷേത്രമാണ് ആല്‍ത്തറ ഭഗവതി ക്ഷേത്രം. അന്നക്കളിക്ക് മുന്നോടിയായുള്ള തീണ്ടിപടയണി ഞായറാഴ്ച  രാത്രി അരങ്ങേറി.         
ഏട്ടടി ഉയരമുള്ള അന്നം (മയില്‍) ദ്വാരകന്‍ താടക തുടങ്ങിയ മര ഉരുക്കള്‍ തപ്പുതാളവാദ്യമേളങ്ങളോടെ എഴുന്നള്ളിച്ച് ദേവീനടയിലെത്തി വലംവച്ച് ക്ഷേത്ര പ്രദക്ഷിണം നടത്തുന്ന ചടങ്ങാണ് അന്നക്കളിയാഘോഷം. തിങ്കളാഴ്ച വൈകിട്ട് നാലിന് തെക്കുംഭാഗം അന്നക്കളിയും ചെവ്വാഴ്ച വടക്കുംഭാഗം അന്നക്കളിയും നടക്കും. രാത്രി പത്തിന് പടയണിയുമുണ്ടാകും. ബുധനാഴ്ചയാണ് താലപ്പൊലിയാഘോഷ സമാപനം.