കോഴിക്കോട്: കലക്ടറേറ്റിലേക്കു മാറ്റിയ മലാപ്പറമ്പ് എ.യു.പി സ്‌കൂള്‍ വിദ്യാര്‍ഥികള്‍ക്ക് ഉച്ചഭക്ഷണം പുനഃസ്ഥാപിക്കാനാവശ്യമായ ഉത്തരവ് നല്‍കുമെന്ന് ബാലാവകാശ കമ്മിഷന്‍ അംഗം നസീര്‍ ചാലിയം അറിയിച്ചു. ജില്ലാ ചൈല്‍ഡ് പ്രൊട്ടക്ഷന്‍ ഓഫിസര്‍ ഷീബ മുംതാസിനൊപ്പം സ്‌കൂള്‍ സന്ദര്‍ശിച്ച ശേഷം അദ്ദേഹം അറിയിച്ചതാണിക്കാര്യം.
2009ലെ സൗജന്യവും നിര്‍ബന്ധിതവുമായ വിദ്യാഭ്യാസ അവകാശനിയമത്തിനു വിരുദ്ധമായി കേരള വിദ്യാഭ്യാസ നിയമത്തില്‍ നിലനില്‍ക്കുന്ന 7 (6) വകുപ്പ് ഭേദഗതി ചെയ്യാന്‍ സര്‍ക്കാരിനോട് കമ്മിഷന്‍ ശുപാര്‍ശ ചെയ്തിട്ടുണ്ട്.
വിദ്യാഭ്യാസ അവകാശ നിയമം നിലനില്‍ക്കേ സ്‌കൂളുകള്‍ അടച്ചുപൂട്ടാന്‍ മാനേജര്‍ക്ക് അവകാശം നല്‍കുന്ന വകുപ്പ് ഭരണഘടനാ വിരുദ്ധമാണെന്ന് കമ്മിഷന്‍ വിലയിരുത്തി.