തൊടുപുഴ: തൊണ്ടിക്കുഴ ഗവ. യു.പി സ്‌കൂളില്‍ മുക്കാല്‍ നൂറ്റാണ്ടിന്റെ ഓര്‍മയില്‍ ഗുരുശിഷ്യ സംഗമത്തിന്  നാളെ വേദിയൊരുങ്ങും. 1931 ല്‍ സ്ഥാപിതമായി നീണ്ട 85 വര്‍ഷം പിന്നിട്ട വിദ്യാലയത്തിന്റെ 85ാം വാര്‍ഷികത്തോടനുബന്ധിച്ചാണ് പൂര്‍വകാല അധ്യാപകരും വിദ്യാര്‍ഥികളും മാതൃവിദ്യാലയത്തിന്റെ മുറ്റത്ത് ഒത്തുചേരുന്നത്.
രാവിലെ 10ന് ഗ്രാമപഞ്ചായത്ത് പ്രസിഡന്റ് ലത്തീഫ് മുഹമ്മദ് സംഗമം ഉദ്ഘാടനം ചെയ്യും. സംഘാടക സമിതി പ്രസിഡന്റ് ടി.എം മുജീബ് അധ്യക്ഷനാവും. പൂര്‍വ അധ്യാപക പ്രതിനിധി എന്‍. സദാനന്ദന്‍ മുഖ്യപ്രഭാഷണം നടത്തും. തുടര്‍ന്ന് ഓര്‍മ പുതുക്കല്‍, ഗുരുശ്രേഷ്ഠരെ ആദരിക്കല്‍, ഭാവി പരിപാടികളുടെ ആസൂത്രണം എന്നിവ നടക്കും. സംഘാടക സമിതി ട്രഷറര്‍ എം.കെ നാരായണ മേനോന്‍ സ്വാഗതവും സെക്രട്ടറി ടി.സി ജോയി നന്ദിയും പറയും.
വൈകീട്ട് നാലിന് വാര്‍ഷികാഘോഷ പൊതുസമ്മേളനം പി.ടി.എ പ്രസിഡന്റ് എ.കെ അബു അധ്യക്ഷനാവും. വാര്‍ഡ് മെമ്പര്‍ ടി.എം മുജീബ് മുഖ്യപ്രഭാഷണം നടത്തും. പഞ്ചായത്ത് മെമ്പര്‍ അശ്വതി ആര്‍. നായര്‍ പ്രതിഭകളെ ആദരിക്കും. തൊടുപുഴ ബി.ആര്‍.സി പ്രോഗ്രാം ഓഫിസര്‍ ടി.എം സുബൈര്‍ വാര്‍ഷികദിന സന്ദേശം നല്‍കും. എം.പി.ടി.എ പ്രസിഡന്റ് സുഹ്‌റ നാസര്‍ സംസാരിക്കും. സര്‍വിസില്‍ നിന്ന് വിരമിക്കുന്ന അധ്യാപിക ലിസി ജോസഫിന് യോഗത്തില്‍ യാത്രയ്രയപ്പ് നല്‍കും. സ്റ്റാഫ് സെക്രട്ടറി കെ.എസ് അബ്ദുല്‍ഖാദര്‍ സ്വാഗതവും സ്‌കൂള്‍ ലീഡര്‍ ഇ.ബി മുഹമ്മദ് അമീന്‍ നന്ദിയും പറയും.
ആഘോഷത്തോടനുബന്ധിച്ച് വിവിധ കലാപരിപാടികളും ഒരുക്കിയിട്ടുണ്ട്. രംഗപൂജ, സംഘ നൃത്തം, ലളിതഗാനം, ഒപ്പന, മാര്‍ഗംകളി, കാക്കാരശി നാടകം, ലഘുനാടകം, നാടന്‍പാട്ട്, കഥപ്രസംഗം, തുടങ്ങിയവയുണ്ടാകും.