കൊല്ലം: കൊട്ടിയത്ത് ആത്മഹത്യ ഭീഷണി മുഴക്കി മരത്തിന്റെ മുകളില്‍കയറിയിരുന്ന യുവാവ് നാട്ടുകാരും ഫയര്‍ഫോഴ്സ് സംഘവും രക്ഷാപ്രവര്‍ത്തനം നടത്തുന്നതിനിടെ കഴുത്തില്‍കയറിട്ട് കുരുക്കി താഴെക്കു ചാടി. മരത്തില്‍ തൂങ്ങി കയറില്‍ കുരുങ്ങി കിടന്ന യുവാവിനെ ഫയര്‍ഫോഴ്സ്സംഘം താഴേക്കിറക്കി. അതീവ ഗുരുതരാവസ്ഥയിലായിരുന്ന ഇയാളെ പൊലിസ്വാഹനത്തില്‍ ആശുപത്രിയിലേക്ക് മാറ്റി.

ചൊവ്വാഴ്ച രാത്രി പത്തരയോടെ മുഖത്തല കോടാലി മുക്കിലായിരുന്നു സംഭവം. സമീപത്ത്വാടകയ്ക്ക് താമസിക്കുന്ന വിനോദാണ് രാത്രി ഒന്‍പതരയോടെ മരത്തിന്റെ മുകളില്‍ കയറി ആത്മഹത്യ ഭീഷണി മുഴക്കിയത്.

കോടാലി മുക്കില്‍ റോഡിനോട് ചേര്‍ന്നപറമ്പിലെ വലിയ പ്ലാവിന്‍ കൊമ്പില്‍ കയറിയപ്പറ്റിയ ഇയാള്‍ കയര്‍ കഴുത്തിലിട്ട് ആത്മഹത്യ ഭീഷണി മുഴക്കി മരത്തില്‍കൊമ്പില്‍ ഇരിപ്പായി. വിവരമറിഞ്ഞ് നാട്ടുകാര്‍ കൂടി. ഫയര്‍ഫോഴ്സ് സംഘവുമെത്തി. താഴെ വലവിരിച്ച് രക്ഷാപ്രവര്‍ത്തനം തുടങ്ങുന്നതിന് മുന്‍പ്തന്നെ ഇയാള്‍ കഴുത്തിലിട്ട കുരുക്കുമായി താഴേക്ക് ചാടി. ഫയര്‍ഫോഴ്സ് സംഘം ഉടന്‍ തന്നെ മരത്തില്‍ കയറി കയര്‍ അറുത്തുമാറ്റി താഴേക്ക് ഇറക്കി. ചെറിയ ശ്വാസം ഉണ്ടായിരുന്നതിനാല്‍ പ്രാഥമിക ചികിത്സ നല്‍കിയ ശേഷം ഉടന്‍ തന്നെ ആശുപത്രിയിലേക്ക് മാറ്റി.