തിരുവനന്തപുരം: കേരള ഭൂപരിഷ്‌കരണ നിയമവും ചട്ടവും അനുസരിച്ച് അര്‍ഹരായവര്‍ക്ക് സര്‍ക്കാര്‍ പതിച്ചുകൊടുക്കുന്ന മിച്ചഭൂമിക്ക് ചട്ടങ്ങള്‍പ്രകാരം പോക്കുവരവ് ചെയ്തുകൊടുക്കുന്നതിനു തടസങ്ങളൊന്നുമില്ലെന്ന് റവന്യൂമന്ത്രി ഇ.ചന്ദ്രശേഖരന്‍ നിയമസഭയെ അറിയിച്ചു.
താലൂക്ക് ലാന്‍ഡ്‌ബോര്‍ഡ് ഉത്തരവുപ്രകാരം മിച്ചഭൂമിയായി ഏറ്റെടുക്കുന്ന ഭൂമിയില്‍ വിതരണത്തിന് അനുയോജ്യമായ മിച്ചഭൂമി സീലിങ് റൂള്‍ 27 പ്രകാരം ഭൂരഹിത കര്‍ഷകത്തൊഴിലാളികള്‍ക്കു വിതരണം ചെയ്യുന്നതിനു ജില്ലാ കലക്ടര്‍മാര്‍ നോട്ടിസ് പ്രസിദ്ധപ്പെടുത്തി അര്‍ഹരായ അപേക്ഷകര്‍ക്ക് മിച്ചഭൂമി വിതരണം ചെയ്യുകയാണു പതിവ്. ഇപ്രകാരം മിച്ചഭൂമി പതിച്ചുനല്‍കി പട്ടയം കൊടുക്കുകയും തുടര്‍ന്നു റവന്യൂ റിക്കാര്‍ഡുകളില്‍ ആവശ്യമായ മാറ്റങ്ങള്‍ വരുത്തുകയും ചെയ്യും. കേരള ഭൂമി പതിവ് നിയമവും ചട്ടവും പ്രകാരമാണു പതിച്ചുനല്‍കിയ പുറമ്പോക്ക് ഭൂമിക്ക് പട്ടയപ്രകാരം പോക്കുവരവ് അനുവദിച്ചുവരുന്നത്. വ്യക്തികള്‍ക്കോ കുടുംബങ്ങള്‍ക്കോ കൃഷി, ഭവനനിര്‍മാണം, അയല്‍വസ്തുവിന്റെ ഗുണകരമായ അനുഭവം എന്നീ ആവശ്യങ്ങള്‍ക്കാണു സര്‍ക്കാര്‍ ഭൂമി പതിച്ചുനല്‍കുന്നതെന്ന് കെ. ബാബുവിന്റെ സബ്മിഷന് മന്ത്രി മറുപടി നല്‍കി.