ഫറോക്ക്: ലൈസന്‍സില്ലാതെ മത്സ്യബന്ധനം നടത്തിയ ബോട്ട് ചാലിയം തീരദേശ പൊലിസ് പിടിച്ചെടുത്തു. ബേപ്പൂര്‍ മാറാടിനു സമീപം കടലില്‍വച്ചാണ് ബേപ്പൂര്‍ പരക്കലകത്ത് ലത്തീഫിന്റെ ഉടമസ്ഥതയിലുള്ള സഹല്‍ ബോട്ട് എസ്.ഐ ഒ സതീഷ് ബാബുവും സംഘവും പിടികൂടിയത്. ഇന്നലെ ഉച്ചയ്ക്ക് 12.30ഓടെയാണ് സംഭവം.
പിടിയിലായ ബോട്ട് ബേപ്പൂര്‍ മറൈന്‍ എന്‍ഫോഴ്‌സ്‌മെന്റ് വിഭാഗത്തിനു കൈമാറി. ഫിഷറീസ് അസി. ഡയറക്ടര്‍ പി. അബ്ദുല്‍ മജീദ്, മറൈന്‍ എന്‍ഫോഴ്‌സ്‌മെന്റ് വിഭാഗം എസ്.ഐ സുജിത് എന്നിവരുടെ നേതൃത്വത്തിലുള്ള പരിശോധനയില്‍ മതസ്യബന്ധനത്തിനുള്ള മതിയായ രേഖകളില്ലെന്നു ബോധ്യപ്പെട്ടു.
ഇതേത്തുടര്‍ന്നു ബോട്ട് പൊലിസ് യാര്‍ഡിലേക്കു മാറ്റി. ബോട്ടിലുണ്ടായിരുന്ന മത്സ്യം 46300 രൂപയ്ക്ക് ഹാര്‍ബറില്‍ ലേലം ചെയ്തു സര്‍ക്കാരിലേക്ക് അടച്ചു. കേരള മറൈന്‍ ഫിഷറീസ് റെഗുലേഷന്‍ ആക്ട് പ്രകാരം രജിസ്‌ട്രേഷനില്ലാത്തതിനും കണ്ണി വലിപ്പം കുറഞ്ഞ വല ഉപയോഗിച്ചു മത്സ്യബന്ധനം നടത്തിയതിനും കേസ് രജിസ്റ്റര്‍ ചെയ്ത് ഫിഷറീസ് ഡെപ്യൂട്ടി ഡയറക്ടര്‍ക്ക് റിപ്പോര്‍ട്ട് നല്‍കി.
തമിഴ്‌നാട്ടുകാരായ 12 തൊഴിലാളികളാണ് ബോട്ടിലുണ്ടായിരുന്നത്.
സിവില്‍ പൊലിസ് ഓഫിസര്‍മാരായ പി. അബ്ദുല്‍ ഗഫൂര്‍, പി.ടി ഷാജുമോന്‍ എന്നിവരും പരിശോധന സംഘത്തിലുണ്ടായിരുന്നു.