ചവറ: തെരുവുനായ്ക്കളുടെ അക്രമത്തില്‍ നിന്ന് രക്ഷപ്പെടാനായി ഓടുന്നതിനിടെ വീണ് പരുക്കേറ്റ യുവതി മരിച്ച സംഭവത്തില്‍ ഭീതിയിലായിരിക്കുകയാണ് പന്മന നിവാസികള്‍. മനുഷ്യജീവന് ഭീഷണിയാകുന്ന നായകളുടെ ശല്യം കാരണം വീടിന് പുറത്തിറങ്ങാന്‍ സാധിക്കാത്ത അവസ്ഥയിലാണ്. പന്മന, പൊന്മന, മാവേലി, ചീരാളത്ത് മുക്ക്, നെറ്റിയാട്, ഇടപ്പള്ളിക്കോട്ട, വെറ്റമുക്ക്, വടക്കുംതല എന്നിവടങ്ങളില്‍  ശല്യം രൂക്ഷമായതോടെ നാട്ടുകാര്‍ ദുരിതത്തിലായിരിക്കുകയാണ്.
 പൊതുയിടങ്ങള്‍ മാലിന്യക്കൂമ്പാരമായതോടെയാണ്  നായ ശല്യം വര്‍ധിച്ചതെന്ന് നാട്ടുകാര്‍ പറയുന്നു. നായശല്യം കാരണം പ്രഭാതസവാരിക്കാരും, സ്ത്രീകളും കുട്ടികളും വളരെ ബുദ്ധിമുട്ടിയാണ് റോഡ് വഴി കടന്ന് പോകുന്നത്.  ദേശീയപാതയോരത്തും ഇടവഴികളിലും അറവുശാലകള്‍, ഹോട്ടലുകള്‍, ബാര്‍ബര്‍ ഷോപ്പ്, പച്ചക്കറി പഴവര്‍ഗ കടകള്‍ എന്നിവടങ്ങളില്‍ നിന്നുള്ള മാലിന്യം തള്ളുന്നത് നിത്യസംഭവമാണ്. ഇത് കാരണമാണ് സമീപത്ത് തെരുവുനായ ശല്യം വര്‍ധിക്കുന്നതെന്ന് പന്മന നിവാസികള്‍ പറയുന്നു. നിരവധി തവണ പഞ്ചായത്തില്‍ പരാതി കൊടുത്തിട്ടും ഫലമുണ്ടായില്ല.
സ്‌കൂള്‍ കുട്ടികളും സ്ത്രീകളുമാണ് നായയുടെ അക്രമണത്തിന് ഇരയാകുന്നത്.  
ഇത് മൂലം കുട്ടികളെ സ്‌കൂളില്‍ അയക്കാന്‍ പോലും രക്ഷിതാക്കള്‍ ഭയക്കുകയാണ്.  അക്രമകാരികളായ തെരുവുനായകളെ  പിടികൂടാന്‍ പഞ്ചായത്ത് നടപടി സ്വീകരിക്കണമെന്നാവശ്യത്തിലാണ് നാട്ടുകാര്‍.
കഴിഞ്ഞ 18ന് ചവറയില്‍ വീടിനുള്ളില്‍ ഉറങ്ങിക്കിടന്ന ഒന്നരവയസുകാരനെ തെരുവുനായ കടിച്ചു വീടിന് സമീപത്തെ പറമ്പില്‍ ഉപേക്ഷിച്ചിരുന്നു. ചവറ പള്ളിയാടി ക്ഷേത്രത്തിന് സമീപം കൃഷ്ണവിലാസത്തില്‍ രഞ്ജിത്തിന്റെ മകന്‍ നന്ദു സുഖം പ്രാപിച്ചു വരുന്നു.