കൊല്ലം: ചെന്നൈ ആസ്ഥാനമായി പ്രവര്‍ത്തിക്കുന്ന പ്രൈം പൊയിന്റ് ഫൗണ്ടേഷനും ഇ-മാഗസീന്‍ പ്രിസെന്‍സും ചേര്‍ന്ന് നടത്തിയ സര്‍വേയില്‍ എന്‍.കെ. പ്രേമചന്ദ്രന്‍ എം.പിയെ പതിനാറാം ലോക്‌സഭയിലെ ബെസ്റ്റ് ഡിബേറ്റര്‍ അവാര്‍ഡിനായി തെരഞ്ഞെടുത്തു.
പതിനാറാം ലോകസഭയില്‍ കഴിഞ്ഞ അഞ്ച് വര്‍ഷങ്ങളിലായി നടത്തി മികവുറ്റ പ്രകടനത്തെ പരിഗണിച്ചാണ് പുരസ്‌കാരത്തിന് തെരഞ്ഞെടുത്തത്.
ഈ കാറ്റഗറിയില്‍ പ്രേമചന്ദ്രന്‍ എം.പിയെ കൂടാതെ ഒറീസയില്‍ നിന്നും ബിജു ജനതാദള്‍ അംഗമായ ബര്‍ത്രുഹരി മഹത്ബനെയും തെരഞ്ഞെടുത്തിട്ടുണ്ട്.19 ന് വൈകിട്ട് മൂന്നിന് ചെന്നൈ രാജ്ഭവനില്‍ ചേരുന്ന ചടങ്ങില്‍ തമിഴ്‌നാട് ഗവര്‍ണര്‍ ബെന്‍വാരിലാല്‍ പുരോഹിത് അവാര്‍ഡ് സമ്മാനിക്കും.
16-ാം ലോകസഭയിലേയും രാജ്യസഭയിലേയും അംഗങ്ങളുടെ പ്രവര്‍ത്തനം വിലയിരുത്തിയാണ് വിവിധ കാറ്റഗറികളിലായി 12 പേരെ അവാര്‍ഡിനായി തെരഞ്ഞെടുത്തത്. ദക്ഷിണേന്ത്യയില്‍ നിന്നും എന്‍.കെ പ്രേമചന്ദ്രന്‍ എം.പി മാത്രമാണ് അവാര്‍ഡിനര്‍ഹനായത്. മുന്‍ രാഷ്ട്രപതി ഡോ. എ.പി.ജെ അബ്ദുള്‍ കലാമിന്റെ മുഖ്യകാര്‍മികത്വത്തില്‍ ആരംഭിച്ച സന്‍സദ് രത്‌ന അവാര്‍ഡിന്റെ പത്താമത് വര്‍ഷത്തെ അവാര്‍ഡാണ് ഇപ്പോള്‍ പ്രഖ്യാപിച്ചത്. 2016-17 വര്‍ഷത്തെ മികവുറ്റ പാര്‍ലമെന്റ് അംഗത്തിനുളള സന്‍സദ് രത്‌ന അവാര്‍ഡും ഇതിനു മുന്‍പ് പ്രേമചന്ദ്രന്‍ എം.പി ലഭ്യമായിട്ടുണ്ട്.
പതിനാറാം ലോകസഭയുടെ കാലയളവില്‍ പാര്‍ലമെന്ററി പ്രവര്‍ത്തനങ്ങളെ വിലയിരുത്തി ബെസ്റ്റ് പാര്‍ലമെന്റേറിയനായി പരിഗണിച്ച് ലോകമത് അവാര്‍ഡ്, ഫെയിം ഇന്‍ഡ്യ അവാര്‍ഡ്, കാശ്മീര്‍ ടു കേരള സോഷ്യല്‍ ഫൗണ്ടേഷന്‍ അവാര്‍ഡ്, സിഎച്ച് മുഹമ്മദ് കോയ രാഷ്ട്രസേവ പുരസ്‌കാരം തുടങ്ങി നിരവധി ദേശീയ പുരസ്‌കാരങ്ങള്‍ എന്‍.കെ പ്രേമചന്ദ്രന്‍ എം.പിക്ക് ലഭ്യമായിട്ടുണ്ട്.